Орос улс дахин 300 мянган цэрэг дайчлахаар төлөвлөж байгааг Зеленский анхааруулжээ
ОХУ дайны ажиллагаанд зориулж дахин 300 мянган цэрэг нэмж дайчлахаар төлөвлөж байгааг Украины Ерөнхийлөгч Володимир Зеленский анхаарууллаа. Түүний хэлснээр, Кремль ирэх онд ийнхүү бие бүрэлдэхүүнээ нэмэгдүүлж, улмаар 2027 он гэхэд энэ тоог 500 мянгад хүргэх зорилт тавьсан байна. Энэхүү шинэ дайчилгааны давалгаа нь 2026 оны есдүгээр сарын 18-наас 20-ны өдрүүдэд товлогдсон ОХУ-ын Төрийн Думын сонгуулийн дараа эхлэх төлөвтэй байгаа бөгөөд Кремль сонгуулийн өмнө олон нийтийн эсэргүүцэлтэй тулгарахаас сэргийлж хүлээж байгаа ажээ.
Оросын тал дайчилгааг явуулахдаа "зах хязгаар нутгийн дайчилгаа" гэх стратегийг баримталж байгааг Зеленский онцлов. Энэ нь Москва, Санкт-Петербург зэрэг томоохон хотуудад нийгмийн бухимдал, эсэргүүцэл үүсгэхээс сэргийлж, алслагдсан, алс бөглүү бүс нутгуудаас цэрэг татах үйл ажиллагааг голчлон зохион байгуулна гэсэн үг юм. Шинээр дайчлагдсан хүчнийг голчлон Донецк мужийн Константиновка, Славянск, Краматорск зэрэг "бэхлэлтийн бүс" хотууд руу илгээхээр төлөвлөж байна. Түүнчлэн эдгээр хүчийг Харьков, Сумы, магадгүй Чернигов эсвэл Киев мужуудад шинэ аюул заналхийлэл буюу "буфер бүс" үүсгэхэд ашиглаж болзошгүйг Украины тал анхааруулж байна.
Оросын дайчилгааны төлөвлөгөөний хариуд Украины тал ч өөрийн цэргийн хүчийг зузаатгах асуудлыг хэлэлцэж эхэлжээ. Украины Парламентын батлан хамгаалах хорооны нарийн бичгийн дарга Роман Костенко сайн дурынхны элсэлт хангалтгүй байгаа тул цэрэг татах насны хязгаарыг өөрчлөх зэрэг дайчилгааны тогтолцоонд "эрс" өөрчлөлт оруулах хувилбарыг авч үзэж байгаагаа мэдэгдсэн байна. Үүний зэрэгцээ Ерөнхийлөгч Зеленский дайны үед сонгууль явуулахыг эрс эсэргүүцэж, энэ нь улс орныг хагаралдуулах аюултай бөгөөд төрийн хувьд "цунами" болно гэж үзэж байгаагаа дахин нотоллоо.
Дайны явцын хувьд Украины тал 2026 онд газар нутгийн алдагдал болон чөлөөлөлтийн харьцааг тэнцвэржүүлнэ гэж тооцоолж байгаа бөгөөд 2024 оны эхнээс хойш Оросын тал ойролцоогоор 267 мянган цэргийн бие бүрэлдэхүүнээ алдсан гэх мэдээллийг өгөв. Олон улсын дэмжлэгийг бэхжүүлэх зорилгоор Зеленский Киев хотноо холбоотон 34 орны төлөөлөгчидтэй уулзаж, агаарын хамгаалалтыг сайжруулах болон ирэх өвлийн бэлтгэлд зориулж Европын холбооноос 30 тэрбум еврогийн санхүүжилт авах асуудлыг хэлэлцэж байна. Мөн тэрээр 2022 онд болсон "Хойд урсгал" хийн хоолойн дэлбэрэлтэд Украины тал оролцоогүй гэдгийг албан ёсоор мэдэгдсэн юм.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.