БНХАУ болон Индонез улс батлан хамгаалах, эдийн засгийн хамтын ажиллагаагаа идэвхжүүлнэ
БНХАУ болон Индонез улсын Гадаад хэрэг, Батлан хамгаалахын сайд нар Жакарта хотноо уулзаж, хоёр талын аюулгүй байдал, батлан хамгаалах болон эдийн засгийн харилцааг шинэ шатанд гаргах хэлэлцээ хийжээ.
2026 оны наймдугаар сарын 21-ний баасан гаргийн эл өндөр түвшний уулзалтаар талууд дэвшилтэт технологи, ашигт малтмал, цэргийн сургуулилалтын чиглэлээр хамтран ажиллахаа мэдэгдсэн байна.
Талууд хоёр гол механизмын хүрээнд хэлэлцээ хийсэн бөгөөд үүнд улс төр, эдийн засгийн хамтын ажиллагаанд чиглэсэн Хятад-Индонезын Иж бүрэн стратегийн яриа хэлэлцээний анхдугаар бага хурал багтжээ. Үүнээс гадна бүс нутгийн аюулгүй байдал, батлан хамгаалах салбарыг чухалчилсан Гадаад хэрэг, Батлан хамгаалахын сайд нарын хамтарсан "2+2" уулзалтыг хоёр дахь удаагаа зохион байгуулсан байна.
Батлан хамгаалах салбарын хамтын ажиллагааны хүрээнд Индонез улс офицер, ахлагч, гэрээт цэргүүдээс бүрдсэн цэргийн бие бүрэлдэхүүнээ БНХАУ-д сургаж, боловсрол эзэмшүүлэхээр төлөвлөж байгааг Индонезын Батлан хамгаалахын сайд Шафри Шамсуддин мэдэгдлээ.
Ирээдүйн хамтын ажиллагаа нь хиймэл оюун ухаан, холбооны хиймэл дагуулыг хамтран хөгжүүлэх зэрэг өндөр технологийн салбарыг хамрах юм. Мөн хүнс, ногоон эрчим хүч, чухал ашигт малтмалын нийлүүлэлтийн сүлжээг хамгаалах, төмөр замын тээвэр, загасны аж ахуйн салбарт хамтран ажиллахаар боллоо.
Хамтарсан мэдэгдлийн үеэр БНХАУ-ын Гадаад хэргийн сайд Ван И дэлхийн өмнөд бүсийн орнууд нягт хамтран ажиллах шаардлагатайг онцолжээ.
Тэрбээр олон улсын өнөөгийн нөхцөл байдал ээдрээтэй байгааг тэмдэглээд, нэг талыг баримтлах үзэл болон ноёрхох гэсэн оролдлого нь дэлхийн хамтын ажиллагаа, тогтвортой байдалд ноцтой нөлөө үзүүлж байгааг анхааруулсан байна.
Саяхан Тайванийн зүүн эрэгт Хятад, Индонезын байлдааны хөлөг онгоцууд хамтарсан сургуулилалт хийсэн нь Тайванийн зүгээс шүүмжлэл дагуулсан билээ. Индонезын Тэнгисийн цэргийн хүчин үүнийг ОХУ-аас буцаж явсан фрегат хөлөг онгоцныхоо ердийн дамжин өнгөрөх сургуулилалт (PASSEX) байсан бөгөөд АНУ, Япон зэрэг дэлхийн бусад гүрнүүдтэй ч ийм сургуулилалтыг тогтмол хийдэг хэмээн тайлбарласан байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.