Францад иссэн жимс идэж согтсон буга замын хөдөлгөөнд аюул учруулж болзошгүйг анхааруулжээ

Францын зүүн хэсэгт орших Сона ба Луара (Saône-et-Loire) департаментад байгалийн иссэн жимс, ургамал идэж "согтсон" буга замын хөдөлгөөнд аюул учруулж болзошгүй хэмээн хууль сахиулагчид анхааруулга гаргажээ. Францын Жандармерийн албанаас замын хажууд хачирхалтай үйлдэл үзүүлж буй бугын бичлэгийг цахим хуудсандаа нийтэлж, иргэдийг сонор сэрэмжтэй байхыг уриалжээ.

Цахим орчинд тархсан дүрс бичлэгт нэгэн буга замын хажууд тойрог хэлбэрээр гүйж, дэвхцэн, улмаар тэнцвэрээ алдан унаж байгаа нь үлджээ. Бугын энэхүү хачирхалтай зан авир нь тээврийн хэрэгслийн хөдөлгөөнд саад учруулах эрсдэлтэй байгааг цагдаагийн байгууллагаас онцолсон аж. Хууль сахиулагчид уг бичлэгийг олон нийтийн сүлжээнд байршуулахдаа "Замын хөдөлгөөнд оролцогч бүр эрүүл биш байна. Үүний баталгааг бичлэгээс үзнэ үү" хэмээн хошигнож, амьтдын зан авир тогтворгүй байгааг анхааруулсан юм.

Мэргэжилтнүүдийн тайлбарлаж буйгаар, хаврын дулаан улиралд зэрлэг амьтад модны нахиа, иссэн зэрлэг жимс эсвэл ялзарч муудсан ургамлаар хооллодог байна. Эдгээр ургамал, жимс нь дулааны нөлөөгөөр муудах явцдаа байгалийн замаар исэж, спирт буюу этанол үүсгэдэг аж. Спирт агуулсан жимс, ургамлыг их хэмжээгээр идсэн зэрлэг амьтдын бие махбодод согтолтын шинж тэмдэг шууд илэрдэг байна.

Ийнхүү согтсон амьтад зам руу гэнэт гүйж орох, эмх замбараагүй хөдөлгөөн хийх, эсвэл замын голд хөдөлгөөнгүй хэвтэх зэрэг маш аюултай үйлдэл гаргадаг байна. Иймд Францын Жандармерийн албанаас жолооч нарыг шөнийн цагаар болон зэрлэг амьтадтай тааралдах эрсдэл өндөртэй орон нутгийн туслах замуудаар зорчихдоо хурдаа тохируулж, өндөр сонор сэрэмжтэй байхыг зөвлөв.

Байгалийн иссэн жимс, ургамалд согтох үзэгдэл нь зөвхөн буга гэлтгүй зэрлэг шувууд, шавьж болон бусад хөхтөн амьтдад ч түгээмэл тохиолддог байна.