🔴Өвөлжилтийн бэлтгэлийг эрчимжүүлж, салбар хоорондын уялдааг хангахыг үүрэг болголоо

Засгийн газар 2026/07/20 18:57 А. Сүнчигмаа AI хөрвүүлсэн

Цаг уурын эрс тэс үзэгдлийн давтамж, аюулын түвшин жилээс жилд нэмэгдэж буйтай холбоотойгоор өвөлжилтийн бэлтгэлийг бүх шатанд эрчимжүүлэх чиглэлийг Ерөнхий сайд Н.Учрал үүрэг болголоо.

Тэрбээр өвөлжилтийн бэлтгэл нь зөвхөн хадлан, тэжээл бэлтгэх ажил бус, төрийн байгууллагуудын төлөвлөлт, эрсдэлийн удирдлага, дэд бүтэц, эрүүл мэнд, эрчим хүч, зам тээвэр зэрэг олон салбарын хамтын ажиллагааг шаардсан үндэсний хэмжээний ажил болохыг онцолсон юм. Засгийн газрын 2026 оны долоодугаар сарын 9-ний өдрийн тогтоолын хэрэгжилтийг нэгдсэн удирдлагаар хангаж, шуурхай арга хэмжээ авахыг холбогдох албан тушаалтнуудад даалгалаа.

Үүний хүрээнд аймаг, нийслэлүүд өвс, тэжээлийн аюулгүйн нөөц бүрдүүлэх, 2027 оны хаврын улирлын хэрэгцээнд зориулсан махны нөөцийг бэлтгэх, мал эмнэлгийн урьдчилан сэргийлэх арга хэмжээг хугацаанд нь чанартай зохион байгуулж, эм, хэрэгслийн нөөцийг бүрдүүлэхийг үүрэг болголоо. Мөн улсын тусгай хэрэгцээний газарт малчдыг отроор өвөлжүүлэх нөхцөлийг бүрдүүлэх, ургацын урьдчилсан балансыг наймдугаар сарын 20-ны дотор гаргаж, ургац хураалтын бэлтгэлийг хангахыг ХХААХҮ-ийн сайдад даалгав.

Ургац хураалтын ажилд оюутан, цэргийн алба хаагчдыг хичээл сургалтыг нь тасалдуулахгүйгээр оролцуулж, хөдөлмөрийн аюулгүй байдал, цалин хөлсийг хангах, хүнсний улаан буудайн стратегийн болон үрийн нөөцийн санхүүжилтийг улсын төсөвт тусгах, экспорт, импортын боомтуудын хэвийн ажиллагааг хангах чиглэлээр холбогдох байгууллагуудад үүрэг өгсөн байна.

Ерөнхий сайд аймаг, нийслэлийн удирдлагуудад бэлчээрийн даацад тулгуурласан отор нүүдлийг зохион байгуулах, малын вакцинжуулалтыг эрчимжүүлэх, эрсдэлийн үнэлгээг шинэчлэх, түлш, хүнс, өвс, тэжээлийн стратегийн нөөцийг бүрдүүлж логистикийн бэлтгэлийг хангахыг чиглэл болголоо. Түүнчлэн орон нутгийн дулааны станц, зуухнуудын засварыг есдүгээр сарын 1-ний дотор бүрэн дуусгаж, Улаанбаатар хотын гэр хорооллын өрхүүдийг 2026-2027 оны галлагааны улиралд сайжруулсан болон хагас коксжсон түлшээр тасралтгүй хангахыг үүрэг болгожээ.

Дээрх ажлуудын хэрэгжилтийг салбар хоорондын уялдаатай зохион байгуулахыг Шадар сайд, УОК-ын даргад даалгасан бөгөөд сайд нар өөрсдийн чиг үүргийн хүрээнд биечлэн хариуцлага хүлээж ажиллахыг сануулав. Мөн отроор яваа малчдад эрүүл мэндийн тусламжийг харьяалал харгалзахгүй үзүүлэх, шатахууны нөөцийг тасалдуулахгүй байх, эрчим хүчний төслүүдийг хугацаанд нь хэрэгжүүлэх, цаг агаарын хүндрэлтэй үед зам, давааны бэлэн байдлыг хангах чиглэлээр холбогдох сайд, агентлагийн удирдлагуудад үүрэг өгсөн байна.

Мөн өмнөх жилүүдийн сургамжийг мартаж болохгүйг онцолж, эрсдэлийг эрт үнэлж, бэлтгэлээ бүрэн хангасан орон нутаг хохирол багатай давдгийг сануулаад, “Цаг алдвал бүхнийг алддаг. Цаг бол алт, харин алт бол цаг биш гэдгийг санаж, хариуцлагатай ажиллах хэрэгтэй” хэмээн үүрэг болголоо.