🔴М.Халтар: АН-ын бүлгийн төлөөлөгчид хуралдаа суух үүрэгтэй атал танхимд алга

Нийслэлийн Иргэдийн Төлөөлөгчдийн Хурлын (НИТХ) ээлжит 7 дугаар хуралдаан 2026 оны 4 дүгээр сарын 27-ны өдөр товлогдож, нийт 23 асуудал хэлэлцэхээр бэлтгэл ажлыг бүрэн хангасан байсан талаар НИТХ-ын Нарийн бичгийн дарга бөгөөд Ажлын албаны дарга М.Халтар мэдээллээ.

Түүний хэлснээр, хуралдаан эхлэхийн өмнө НИТХ дахь Ардчилсан намын бүлгээс хэлэлцэх асуудлын жагсаалтын хоёрт багтсан "Туулын хурдны замтай холбоотой хаврын хөдөлгөөн өрнүүлэх тухай" асуудлыг хэлэлцэхээс хойшлуулах тухай албан тоот ирүүлжээ. Уг асуудал нь иргэдийн эсэргүүцэлтэй тулгарсан, авлига, ашиг сонирхлын зөрчилтэй байж болзошгүй талаар хэвлэл мэдээллээр гарсан, мөн Ерөнхий сайд болон Засгийн газрын хуралдаанаас хууль, хяналтын байгууллагаар шалгаж дуустал зогсоох шийдвэр гаргасан зэргийг үндэслэн ийнхүү хойшлуулах санал гаргасан байна.

Энэхүү саналыг үндэслэн НИТХ-ын даргын 90 тоот захирамж гарч, өнөөдрийн 10:00 цагт товлогдсон ээлжит 7 дугаар хуралдааныг тодорхойгүй хугацаагаар хойшлуулжээ. Захирамжийн дагуу төлөөлөгчдийг мэдээллээр хангах үүргийг Ажлын албаны даргад өгсөн бөгөөд тэрээр 12:10 цагт уг захирамжийг хүлээн авч, төлөөлөгчдөд танилцуулан хүлээлтийн байдалтай байгаагаа илэрхийлэв.

Нөгөөтэйгүүр, НИТХ дахь МАН-ын бүлэг хуралдаж, зөвхөн маргаантай байгаа нэг асуудлыг хойшлуулж, үлдсэн 22 асуудлыг хэлэлцэх боломжтой гэх байр суурийг илэрхийлсэн байна. Одоогийн байдлаар хурлын танхимд МАН-ын 25-26 төлөөлөгч, хурлын ажлын алба, Нийслэлийн Засаг даргын Тамгын газар болон харьяа агентлаг, орон нутгийн өмчит үйлдвэрийн газруудын төлөөлөл бүрэн ирсэн хэдий ч АН-ын төлөөлөгчид болон хурлын дарга ирээгүй байна.

Засаг захиргаа, нутаг дэвсгэрийн нэгжийн тухай хууль болон НИТХ-ын хуралдааны дэгийн дагуу хурлыг Хурлын дарга эсвэл түүний санал болгосон төлөөлөгч удирдан явуулах хуулийн зохицуулалттай. Хэдийгээр төлөөлөгчид хуралдаанд оролцох үүрэгтэй ч АН-ын бүлгийн төлөөлөгчидтэй холбогдох боломжгүй, тодорхой мэдээлэл өгөөгүй байгааг тэрээр нэмж хэллээ.