🔴Ц.Туваан: Нүүрстэй холбоотой хардлага хэрээс хэтэрч байна

УИХ-ын гишүүн Ц.Туваан нүүрсний асуудал, Хянан шалгах түр хороо байгуулах болон АН-ын бүлгийн даргын сонгуулийн талаар өөрийн байр сууриа илэрхийллээ. Тэрбээр УИХ-ын гишүүн болон АН-ын бүлгийн гишүүний хувьд аливаа асуудал нээлттэй, ил тод, шилэн байх ёстой гэсэн зарчмыг баримталдаг бөгөөд энэ нь олон нийт үнэн зөв мэдээлэл авах, хяналт тогтоох гол нөхцөл гэдгийг онцлов.

УИХ-ын гишүүн Ц.Туваан:

-Шинэчлэгдсэн УИХ-ын тухай хуульд Хянан шалгах түр хороотой холбоотой зохицуулалт шинээр орж ирсэнд талархалтай байгаа. Түр хороо байгуулагдсанаар олон талын байр суурийг сонсож, нотолгоо судалгаатай, үндэслэлтэй мэдээллийг иргэдэд хүргэх боломж бүрддэг. Гэсэн хэдий ч хуулиар нэгэн зэрэг хоёр түр хороо ажиллах хязгаарлалттай тул нүүрснээс гадна байгаль орчин, нийслэлийн газар, утаа зэрэг олон асуудал дарааллаа хүлээж, хойшлох нөхцөл үүсэж байгаа. 

Нүүрсний асуудал нь ард иргэдийн дунд маш их хардлага, сэрдлэг дагуулдаг сэдэв. Өмнө нь Ухаа худаг болон Харбины хэлэлцээртэй холбоотой түр хороо байгуулах асуудал чуулганы хуралдаанаар олонхын дэмжлэг авч чадалгүй унасан. Харин "Бодь"-той холбоотой асуудлаар АН-ын 42 гишүүн нэгдсэн байр суурьтай байж чадвал түр хороо байгуулахад шаардлагатай 32 гишүүний гарын үсэг амархан бүрдэж, асуудал хурдан шийдэгдэнэ гэдгийг бүлгийн даргадаа уламжилсан.

Салбар ахалж байсан хүний хувьд Ухаа худгийн лиценз, Харбины хэлэлцээр, Гашуунсухайт-Ганцмодны хил холболтын асуудалд оролцож байсны хувьд эдгээр нь их хэмжээний мөнгөн дүнтэй холбогддог тул бүх зүйл нээлттэй байх ёстой гэж үздэг. Төрд ажиллаж байгаа хүмүүс шүүмжлэлээс айж хойш суухгүйгээр, олон жил гацсан, улс орны эдийн засагт хэрэгтэй асуудлуудыг зоригтой, хурдтай шийдвэрлээд явах ёстой. Зарим үед авлигачин, хулгайчаар дуудуулан гүтгүүлэх нь гэр бүл, найз нөхдөд хүндээр тусдаг тул хурдан шалгагдаж, үнэн мөн нь ил тод болоосой гэж хүсдэг ч улс орны эрх ашигт нийцсэн шийдвэрийг гаргах нь чухал.

АН-ын бүлгийн даргын асуудлын тухайд ирэх долоо хоногийн бүлгийн хуралдаанаар шийдэгдэх болов уу гэсэн хүлээлттэй байгаа. Миний хувьд бүлгийн даргад өрсөлдөх бодолгүй байгаа. Бусад залуучууд, гишүүддээ боломж олгох нь зүйтэй гэсэн байр суурьтай байгаа гэв.