🔴Э.Батшугар: Байгалийн баялагтай холбоотой оффтейк гэрээнүүдийг ил болгох ёстой

УИХ-ын гишүүн, Эрүүл мэндийн сайд Э.Батшугар уул уурхай, байгалийн баялаг, нийслэлд хэрэгжих мега төслүүд болон эрүүл мэндийн салбарын цалин, хөнгөлөлттэй эмийн асуудлаар байр сууриа илэрхийллээ.

УИХ-ын гишүүн, Эрүүл мэндийн сайд Э.Батшугар:

-Байгалийн баялаг, нүүрсний гэрээтэй холбоотой бүх мэдээлэл ард түмэнд ил тод байх ёстой. Үндсэн хуулийн 6.2-т заасны дагуу баялгаас олох үр ашиг нь Баялгийн сангаар дамжин нийт Монголчууд болон ирээдүй хойч үед жигд хуваарилагдах ёстой. Аливаа гэрээг төрийн нууцад хамааруулж далдлах нь нүүрсний хулгай зэрэг хардлага, сэрдлэгийг дагуулдаг учраас УИХ энэ асуудлыг нээлттэй хэлэлцэж, эцсийн цэгийг тавих шаардлагатай.

Нийслэлийн түгжрэлийг бууруулах зорилготой Туулын хурдны зам зэрэг мега төслүүдийг хэрэгжүүлэх нь зүйтэй ч үйл явц нь нээлттэй, ил тод байх ёстой. Энэ төслийн тендерт нийслэлийн нэр бүхий албан тушаалтнуудын хамаарал бүхий компани шалгарсан эсэх, албан тушаалын давуу байдал үүсгэсэн эсэхийг хууль хяналтын байгууллага шалгаж тогтоох шаардлагатай гэж үзэж байна. Хоёр их наяд төгрөгөөр хэмжигдэх уг төсөлд эдийн засгийн нарийвчилсан үнэлгээ хийхийн зэрэгцээ гүүрэн байгууламжууд Туул голын голдиролд хэрхэн нөлөөлөх талаар усны болон мэргэжлийн байгууллагуудын байгаль орчны дүгнэлтийг заавал гаргуулах хэрэгтэй. 

Өмнө нь эмч нарын үндсэн цалинг нэмэгдүүлсэн ч илүү цаг, жижүүрийн хөлсийг хуучин цалингаар тооцож, татвар авахдаа нэмэгдсэн дүнгээр суутгадаг байсан гажуудлыг засаж, нэгдсэн нэг цалингийн системд шилжүүлсэн. Цалин хөлсийг нэмэгдүүлэхийн хэрээр эмч, эмнэлгийн ажилтнуудын хариуцлагыг өндөржүүлж, иргэдэд үзүүлэх тусламж үйлчилгээг цаг алдалгүй, чанартай хүргэхэд онцгой анхаарч ажиллах шаардлагатай.

Надтай холбоотой гарсан эмийн компаниудын ашиг сонирхлын зөрчилтэй гэх мэдээлэл худлаа. Энэ асуудлаар өмнө нь хангалттай тайлбар өгсөн. Хөнгөлөлттэй эмийн жагсаалтыг Эрүүл мэндийн сайд дангаараа бус, Эрүүл мэндийн даатгалын үндэсний зөвлөл болон Эмийн зөвлөл хамтран шийдвэрлэдэг болно. Одоогоор эмийн жагсаалтыг шинэчлэх судалгааны ажил хийгдэж байгаа. Ойрын хугацаанд хөнгөлөлттэй эмийн жагсаалт, үнийн дээд хязгаар болон хөнгөлөлтийн хувь хэмжээг эцэслэн баталж, иргэдэд илүү хүртээмжтэй байх нөхцөлийг бүрдүүлэхээр ажиллаж байгаа гэв.