УИХ-ын чуулганы нэгдсэн хуралдаанаар Монгол Улсын хөгжлийн 2026 оны төлөвлөгөө батлах тухай УИХ-ын тогтоолын төслийн нэгдэх хэлэлцүүлгийг хийж байна. Хэлэлцэж буй асуудалтай холбогдуулан гишүүдийн байр суурийг хүргэж байна. 

УИХ-ын гишүүн Б.Найдалаа:

-Миний хувьд 2-3 анхаарах зүйл байна гэж харлаа. Ер нь бол байдаг л зорилтууд орж ирсэн. Төрийн албан хаагчийн тоог есөн хувиар бууруулна гэж байна. Эмч, багшаас бусдыг нь цөөрүүлэх юм байна л даа. Яг хэдэн хувиар бууруулах, хаанаас албан тушаал цөөлөх вэ гэхээр нарийн тодорхой тоо хэлэхгүй байна. Тодорхой баймаар байна. 2026.12.31 гэхэд цөөлөх есөн хувь хаанаас буурах вэ, одоо хэдэн төрийн албан хаагч байна вэ гэхээр хариултгүй. Би мэдэх гээд байгаадаа биш иргэдэд мэдээлэл хүргэмээр байгаа юм. 

Хоёрдугаарт, 14 мега төсөл. Өнгөрсөн жил мега төслийг баталснаас хойш дэлхийн эдийн засаг өөрчлөгдсөн. Дагаад манай улсын эдийн засаг нүүрсний үнэ унаснаас үүдэж хэцүүдсэн. 14 мега төсөл гэдэг бол асар том бүтээн байгуулалт шүү дээ. Цаг үеэр дагаад эрэмбэлэх зарчмаа тохирмоор байна. Жишээ нь, хиймэл дагуул яг хэрэгтэй юу. Яг хэрэгтэй гэвэл хамгийн эхэнд хийх ажил мөн үү. Мөн Богд уулыг тэр их зардлаар богино хугацаанд нүхлэх нь зөв үү. Тойруулаад зам тавьчихвал эдийн засгийн тооцоолол талаасаа амар юм биш үү. Богдхан гээд сүсэг бишрэл хүндэтгэл талаасаа, тунелийн байнгын асаргааг бодсон ч гэсэн эхэндээ байх нь зөв үү. Төсөв мөнгө дутвал энэ мэт төслийг хасах юм уу хойшлуулмаар байгаа юм.

Энэ жил төсвөө хасах нэрийдлээр ганц ч сургууль барьсангүй. Иргэдэд эмнэлэг сургууль хэрэгтэй болохоос Богд уул нүхлэх нь тэр бүр  хэрэггүй. Монгол улсад нэг ангид 70-80 хүүхэд суудаг асуудал байж болох уу. Төсвийг бусад хэсгээс хасаад сургууль баримаар байгаа юм гэв. 

---