Н.Өнөрцэцэг: Намайг төрийн нууц хадгалсан гэж яллагдагчаар татсанд гайхаж байна

Зариг.мн сайтын эрхлэгч, сэтгүүлч Н.Өнөрцэцэгт холбогдох гэм буруутай эсэхийг шүүх хурал өнөөдөр хоёр дахь өдрөө үргэлжилж байна. Шүүх хурал түр завсарлаж, сэтгүүлч Н.Өнөрцэцэг мэдээлэл хийлээ. 

Сэтгүүлч Н.Өнөрцэцэг: 

-Шүүх хурал хаалттай болж байгаа учраас шүүх хурлын талаар нарийн ярьж болохгүй. Тиймээс болох хэмжээнд ярина гэж бодож байна. Миний хувьд өмгөөлөгчгүй байна. Олон хэрэгт буруутгагдаж буй миний хувьд өмгөөлөгч маш хэрэгтэй байна.

Би нэг зүйлд гайхаж байна. Намайг төрийн нууц хадгалсан гэж яллагдагчаар оны өмнөөс татаж шалгасан. Төрийн нууцыг нь би хадгалсан юм бол задруулсан хүн хэн бэ гэдэг эрэлд гарсан. Нэг хүн задруулсан байж таарч байна. Надаас, миний хамаарал бүхий хүнээс төрийн нууц нь гарсан байх гэсэн үндсэн асуудлыг тавьж байгаа. Гэтэл харамсалтай нь задруулсан гээд байгаа төрийн албан хаагч, сайд, дарга өнөөдөр шүүгдэхгүй байна. Хадгалсан гэж би шүүгдэж байна. Нэг нь төрийн нууцыг хадгалаад нөгөө нь түүнийг задруулсан ийм хоршсон үйлдэл болж таарч байгаа юм. Гэтэл тэр задруулсан гээд байгаа дарга нь алга байгаа нь хачирхалтай. Би төрийн нууц хадгалсан, задруулсан зүйл байхгүй.

Татвар төлөхөөс зайлсхийсэн гэж намайг мөн буруутгаж байна. Өнгөрсөн хугацаанд Зариг.мн сайтыг эрхлэн явуулдаг “Ган үзэгтэн” компани 500 гаруй сая төгрөгийг улсад татвар байдлаар төлсөн байна. Би мэдэхгүй, чадахгүйгээсээ алдаа гаргасан байж магадгүй. Түүнээс санаатайгаар татвараас зайлсхийсэн зүйл байхгүй.

Миний данс тооцоог нэг бүрчлэн шалгаж байна. Буяны 50 мянган төгрөгийг шалгаж байна. Аккумулятор худалдан авсан асуудлыг хүртэл шалгаж байна. Татвар төлөхөөс зайлсхийсэн гээд буруутгаж байгааг ойлгохгүй байна. Нягтлан бодогч руугаа “За наад татвараа нууна шүү” гээд нэг удаа залгаж, ярьсан баримт байгаа бол өөр хэрэг, тийм юм байхгүй. Энэ асуудал дээр өмгөөлөгч авъя гээд бүтсэнгүй.

Би шүүх засаглалд итгэх итгэл алдаагүй байгаа. Үнэн зөв шийднэ гэж найдаж байна гэв.