Монгол Улсаас БНСУ-д суугаа Элчин сайдын яамны дипломат ажилтан согтуугаар тээврийн хэрэгсэл жолоодож яваад цагдаа нарт баригджээ.

Тодруулбал, 40 орчим насны эрэгтэй А нь энэ сарын 9-ний өглөөний 9 цагт Сөүл хотын Ёндунпу дүүргийн нутаг дэвсгэр дэх авто зам дээр согтууруулах ундааны зүйл хэрэглэсэн үедээ тээврийн хэрэгсэл жолоодож явсныг цагдаагийн алба хаагчид саатуулсан байна. Тухайн үед замын хөдөлгөөнд оролцож байсан жолооч нар цагдаагийн байгууллагад дуудлага мэдээлэл өгсний дагуу алба хаагчид А-г олж тогтоон, саатуулж, согтуурлын зэрэг хэмжигч багаж руу үлээхийг хүссэн боловч А нь өөрийгөө дипломат ажилтан болохыг илчлээд, согтолтын түвшнээ тогтоолгохоос татгалзсан аж. Үүний дараагаар, ЭСЯ-ны өөр нэг ажилтан хэргийн газарт ирж, А-г авч явсан болохыг тус улсын хэвлэлүүд мэдээлжээ.

Дипломат алба хашиж буй аливаа алба хаагч нь халдашгүй дархан эрхтэй байдаг хэдий ч Ёндунпу дүүргийн цагдаагийн байгууллагаас “Согтолтын зэргээ тогтоолгохоос татгалзах нь ч мөн жолоодох эрхийг хасах үндэслэл болно” хэмээсэн бөгөөд холбогдох захиргааны журмын дагуу арга хэмжээ авахаар төлөвлөж буйгаа мэдэгдсэн юм.

Харин Өмнөд Солонгосын Гадаад хэргийн яамнаас уг дипломат ажилтны талаар “Хэрвээ согтуугаар тээврийн хэрэгсэл жолоодох байдал давтагдах юм бол бид түүнийг сайн дураараа нутаг буцахыг зөвлөх болно” гэжээ.

Тэгвэл тус улсын "Channel A" телевизээс энэ асуудлын талаар Монгол Улсаас БНСУ-д суугаа Элчин сайдын яамнаас тодруулахад “Холбогдох дипломат ажилтан нь согтуугаар тээврийн хэрэгсэл жолоодсон гэдгээ хүлээн зөвшөөрсөн ба удахгүй цагдаагийн байгууллагад шалгуулах болно” хэмээсэн ч А нь халдашгүй дархан эрхээсээ татгалзах эсэх нь тодорхойгүй байна гэж мэдээлжээ.

Эх сурвалж: KBS News, Channel A

---