БНХАУ-ын нэгэн тагнуул Их Британийн улс төрд хөндлөнгөөс нөлөөлөхийн тулд Парламентын гишүүдтэй холбоо тогтоож байгааг тус улсын Аюулгүй байдлын алба болох "МИ5" анхааруулжээ.

Албан ёсны сэрэмжлүүлэгт, Кристин Чинг Куй Ли гэх эмэгтэй Хятадын Коммунист намын өмнөөс Их Британийн Парламентын одоогийн гишүүд болон ирээдүйд гишүүн болж болзошгүй хүмүүстэй "холбоо тогтоосон" аж. Тэрээр мөн эдгээр улс төрчдөд хандив өргөсөн бөгөөд санхүүжилтээ Хятад, Хонг Конг дахь гадаадын иргэдээс авсан байна.

Жишээлбэл, Хөдөлмөрийн намын гишүүн Барри Гардинер таван жилийн дотор хатагтай Лигээс 420 мянган фунт стерлинг авсан нь тогтоогдсон хэдий ч тэрээр энэхүү хандивын талаар Аюулгүй байдлын албанд үргэлж мэдэгдсээр ирсэн гэж мэдүүлсэн юм.

Харин Кристин Ли өөрийнхөө үйлдлийг "Их Британи дахь хятад иргэдийг төлөөлж, олон талт байдлыг нэмэгдүүлэх" зорилготой байсан гэж мэдэгджээ. Тэрээр Лондон болон Бирмингемд оффистой хуулийн фирм ажиллуулдаг аж.

"МИ5" нь ийм төрлийн сэрэмжлүүлэг гаргах нь ховор тохиолдол бөгөөд энэ удаагийн мэдээллийг "чухал ач холбогдолтой, урт хугацааны" мөрдөн байцаалтын үр дүнд олж авсан гэж тэмдэглэсэн байна.

Тэгвэл БНХАУ-ын зүгээс Их Британийн улс төрд хөндлөнгөөс оролцсон гэх явдлыг эрс үгүйсгэж байгаа юм.

Лондон дахь Хятадын Элчин сайдын яамны мэдэгдэлд "Хятад улс бусад орны дотоод хэрэгт хөндлөнгөөс оролцохгүй байх зарчмыг ямагт баримталдаг. Бид гадаадын аль ч Парламентад "нөлөөллийг худалдаж авах" шаардлагагүй бөгөөд хэзээ ч оролдохгүй. "МИ5" Их Британи дахь хятад иргэдийг гутаан доромжилж, айлган сүрдүүлж байгааг бид эрс эсэргүүцэж байна" хэмээн бичжээ.

Эх сурвалж: BBC

---