"Miss Grand International" өөрийн харьяаны гадны моделийг Монгол Улсын нэрийн өмнөөс шууд томилжээ

Тайланд улсад зохион байгуулагдаж буй “Miss Grand International 2026” олон улсын гоо сайхны тэмцээний бүртгэлд БНХАУ-ын иргэн, 24 настай загвар өмсөгч Амбер Юхан (Amber Yuhan) Монгол Улсын нэр, туузыг зүүж оролцохоор бүртгүүлсэн нь иргэдийн эсэргүүцэлтэй тулгараад байна. Албан ёсны танилцуулга дээр түүний байршлыг Улаанбаатар хот хэмээн тэмдэглэжээ. 

Уг тэмцээний үндэсний хэмжээний шалгаруулалт дотоодод зохион байгуулагддаггүй бөгөөд албан ёсны франчайз, лицензийн эрхийг гадаадын агентлаг эзэмшдэг байна. Тус эрх эзэмшигч байгууллага нь оролцогчийг сонгон шалгаруулахгүйгээр, өөрийн харьяаны гаднын моделийг манай улсын нэрийн өмнөөс шууд томилсон нь тодорхой болжээ. Өмнө нь 2022 онд мөн энэхүү шугамаар Саха (Якут) гаралтай моделийг өөр улсаас нэр дэвшүүлэн оролцуулж байсан тохиолдол гарч байсан аж.

Тусгаар улсын нэр хүнд, төрийн бэлгэ тэмдгийг харь улсын иргэн зүүж олон улсын тайзнаа гарахыг эсэргүүцэн “ANDRA Academy”-ийн үүсгэн байгуулагч, Топ модель Х.Бадамгэрэл “Miss Grand International” байгууллагын удирдлагуудад албан ёсны шаардлага хүргүүлсэн байна. Уг шаардах бичигт Амбер Юханы иргэншил, оршин суух эрх болон албан ёсны төлөөлөл болох эрх зүйн үндэслэлийг баримтаар нотлохыг тусгажээ. Түүнчлэн лиценз эзэмшигч байгууллагын нэр, сонгон шалгаруулалтын дүрмийг олон нийтэд ил тод мэдээлэхийг шаардсан байна.

Шалгалтын ажиллагаа бүрэн дуусах хүртэл оролцогчид төрийн далбаа, нэршил бүхий тууз ашиглахыг нэн даруй түдгэлзүүлэх шаардлагыг тавьжээ. Хэрэв хууль ёсны үндэслэлгүй нь тогтоогдвол оролцох эрхийг бүрмөсөн цуцалж, зохион байгуулагчдын зүгээс албан ёсны залруулга гаргахыг уг шаардлагад хатуу анхааруулсан байна.

Х.Бадамгэрэл төрийн бэлгэдлийг хууль бусаар ашиглаж буй асуудлаар салбарын яамны сайдтай 13 цагт уулзахаар болжээ. Мөн мисс Б.Гүнзаяа тэргүүтэй мэргэжлийн салбарынхан Гадаад харилцааны яам болон Соёлын яамыг тусгаар улсынхаа нэр төрийг хамгаалж, зохих дипломат арга хэмжээ авахыг уриалж байна.