Индонезийн тэнгист осолдсон гатлага онгоцны ослоор амиа алдагсдын тоо 66-д хүрчээ
Индонезийн Явагийн тэнгист зорчигч тээврийн гатлага онгоц хөмөрч осолдсоны улмаас амиа алдсан хүний тоо 66-д хүрч, эрэн хайх, аврах ажиллагаа 16 дахь өдрөө үргэлжилж байна. Одоогоор ослын бүсээс 108 хүнийг эсэн мэнд аварсан хэдий ч 69 иргэн сураггүй хэвээр байгаа тул эрх баригчид эрлийн бүсийг өргөтгөн ажиллаж байна.
Нийт 4,277 тоннын даацтай “Virgo Transport 8” хөлөг онгоц Зүүн Ява мужийн Сурабая хотоос Өмнөд Калимантан мужийн Банджармасин хотыг чиглэн явж байхдаа осолджээ. Цаг агаарын таагүй нөхцөл байдал үүсэж, хүчтэй салхи шуурга дэгдсэний улмаас далайн өндөр давалгаанд цохигдон хөмөрсөн гэж холбогдох албаныхан урьдчилсан байдлаар дүгнэсэн юм. Уг хөлөгт багийн 30 гишүүн, үйлчилгээний 27 ажилтан, 60 зорчигч болон 126 жолооч, туслах зэрэг нийт 243 хүн зорчиж явснаас гадна 89 тээврийн хэрэгсэл ачигдсан байжээ.
Ослын талбайд ажиллаж буй аврагчид ойролцоогоор 27 метрийн гүнд живсэн хөлгийн их бие рүү нэвтрэн эрэн хайх ажиллагааг гүйцэтгэж байна. Гэвч далайн ёроолд хажуу тийш налан тогтворгүй байрласан хөлгийн дотор талд хурц ирмэгтэй эд зүйлс ихээр тархсан төдийгүй шатахуун алдагдаж, өтгөн хий хуримтлагдсан нь шумбагчдын аюулгүй байдалд ноцтой эрсдэл үүсгэж буйг албаныхан онцоллоо. Банджармасины Эрэн хайх, аврах албаны удирдлагуудын мэдээлснээр тэнгисийн мандлаас болон хөлгийн дотроос илрүүлсэн цогцсуудыг эрэг дагуу болон нисдэг тэргээр тээвэрлэн шилжүүлж байна.
Эх сурвалж:
• eagle.mn
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.