ОХУ-ын Эрхүү хотноо энэ сарын 11-13-ны өдрүүдэд болсон УБТЗ ХНН-ийн төлөөлөн удирдах зөвлөлийн хуралд ЗТХ-ийн Ж.Бат-Эрдэнээр ахлуулсан 10 хүний бүрэлдэхүүнтэй ажлын хэсэг оролцсон.

УБТЗ ХНН-ийн шинэ даргын томилгоо болон бусад 11 асуудлыг хэлэлцэх ёстой байсан уг хурал амжилтгүй болж, “Оросын төмөр замууд” ХНН-ийн Ерөнхий захирлын нэгдүгээр орлогч С.А.Павлов хурлыг дундаас нь орхин гарсан гэх албан бус мэдээлэл байна.

Учир нь Оросын талаас УБТЗ-ийн даргыг энэ удаад бид томилно гэсэн бол Монголын талаас Г.Сэрээнэндорж, Б.Даваасүрэн, Ц.Хүрэлбаатар нарын аль нэгийг томилуулна хэмээн гөжсөнөөс дээрх хурал амжилтгүй өндөрлөсөн бололтой.

Улмаар ТУЗ-ийн хурал амжилтгүй болсон уурссан ЗТХ-ийн дэд сайд Ж.Бат-Эрдэнэ “Аэро Монголия” компаниас хөлсөлсөн “А319” онгоцондоо УБТЗ-ийн даргын үүргийг гүйцэтгэгч, нэгдүгээр орлогч бөгөөд Ерөнхий инженер И.В.Милостныхыг суулгахгүй хэмээн гөжүүдэлсэн гэх мэдээлэл байна. Үүнд нь уурласан оросууд уг онгоцонд Эрхүү хотоос хөөрөх зөвшөөрөл олгохгүй 22.00 цагийг хүргэсэн гэх шуугиан твиттерээр хөвөрч байна.

Бид уг мэдээллийг ЗТХЯ-ны хэвлэлийн төлөөлөгчөөс тодруулахад “УБТЗ ХНН-ийн ТУЗ-ийн хуралд оролцохоор Монголын бүрэлдэхүүн явсан нь үнэн. Харин тэр хурлаас ямар шийдвэр гарсан эсэх талаар ямар ч мэдээлэл надад алга. ЗТХ-ийн Дэд сайдын онгоц саатсан эсэх талаар би юу ч олж сонсоогүй, мэдэхгүй, мэдэхгүй” гэх хариултыг л өглөө.

---