Монголын орон сууц, нийтийн аж ахуйн үйлчилгээний ажилтны Үйлдвэрчний эвлэлийн холбоо болно тус салбарын ажилчдын төлөөлөл “ОСНАА-орхигдуулж болохгүй салбар” акцыг Сүхбаатарын талбай дээр зохион байгууллаа.  Тэд цалингаа нэмэгдүүлэхийг шаардаж бөмбөлөг хөөргөлөө.

Б.Жавзандулам: ОСНААҮ-ний салбар ажиллах хүчний хомсдолд орсон

Салбарын үйлдвэрчний эвлэлийн холбооны дарга Б.Жавзандулам:

-Жилийн дөрвөн улирлын турш байнгын өндөржүүлсэн бэлэн байдалд, 24 цагаар эмч, цагдаа, онцгойгийн алба хаагчидтай адилхан тасралтгүй үйл ажиллагаа явуулдаг салбарын ажилтнуудын цалин хөлс, нийгмийн хамгааллын асуудлуудыг сайжруулахаар өнөөдөр хөндөн тавьж байна. 

Улсын хэмжээнд 130 гаруй орон сууцны байгууллагууд төр, орон нутаг, хувийн хэвшил гэсэн өмчийн олон хэлбэртэйгээр үйл ажиллагаа явуулж, 15 мянга гаруй хүн ажилладаг.

ХНХЯ-наас 2019 онд гарсан цалин хөлсний судалгаанаас харвал улсын дундаж цалин 1,067,900 төгрөг байгаа бол манай салбарын дундаж цалин 829,000 төгрөг байна.

Холбооноос хийсэн судалгаагаар ОСНААҮ-ний салбар ажиллах хүчний хомсдолд орсон гэх үр дүн гарсан бөгөөд нийт ажиллагчдын 43 хувь нь дөрөв хүртэл жилийн хугацаанд ажлаасаа гардаг. Ажлаасаа гарч байгаа шалтгаан нь цалин бага, нийгмийн хангамж муу, суралцах асуудал дээр дэмждэггүй, цалингийн хэмжээ ипотекийн зээлийн шалгуурт нийцдэггүй зураг байдгийг хэлж байгаа юм.

Тиймээс 2022 оны төсөв хэлэлцэгдэж эхлэх гэж байгаа энэ үед манай салбарын цалинг нэмэгдүүлэх асуудлаар холбогдох албаныханд хандаж байна.

Тиймээс салбарын үйлдвэрчний эвлэлийн холбооноос Барилга хот байгуулалтын сайд Б.Мөнхбаатар, Нийслэлийн засаг дарга бөгөөд улаанбаатар хотын захирагч Д.Сумъяабазар, НИТХ-ын дарга бөгөөд ОСНААУГ-ын ТУЗ-ын дарга Б.Батбаясгалан, ОСНААУГ-ын дарга Ч.Мэндбаяр нарт хүргүүлсэн албан бичигт дурдагдсан асуудлуудыг шийдвэрлүүлэх шаардлага тавьж байгаа юм. 

---