БНХАУ-д нэгэн иргэн экскаватор жолоодон төрийн үйлчилгээний төвийг сүйтгэжээ

БНХАУ-ын Шэньси мужийн Шиань хотод 47 настай иргэн том оврын гинжит экскаватор жолоодон төрийн үйлчилгээний байр руу дайрч, барилгыг эвдэн сүйтгэжээ. 2026 оны 11 дүгээр сарын 9-ний Даваа гаргийн өглөө 11:00 цагийн орчимд Төрийн үйлчилгээний төвийн цогцолборт дээрх үйл явдал болсон байна. 

Ху овогт эрэгтэй экскаваторын утгуурыг ашиглан үйлчилгээний төвийн нэгдүгээр байрны гол хаалга, үүдний саравч, явган шат, шилэн хаалга болон гадна фасадыг цохин нураажээ. Бүтэн цаг орчим үргэлжилсэн халдлагын улмаас тус захиргааны цогцолборын нийт зургаа орчим хэсэг эвдэрч сүйтгэгдсэн байна. Аюултай нөхцөл байдал үүссэн даруйд барилга дотор ажиллаж байсан төрийн албан хаагчид болон үйлчлүүлэгчдийг шуурхай нүүлгэн шилжүүлсний үр дүнд хүний амь нас эрсдээгүй, бэртэж гэмтсэн тохиолдол гараагүй юм.

Хэрэгтэн экскаваторынхоо хөдөлгүүрийг зогсоосны дараа цагдаагийн тусгай албаныхан хэргийн газарт шуурхай ажиллан түүнийг саатуулан баривчилжээ. Одоогийн байдлаар эрх бүхий байгууллагууд барилга байгууламжид учирсан эдийн засгийн нийт хохирлын хэмжээг шалгаж байгаа аж.

Эх сурвалжуудын мэдээлж буйгаар уг этгээд хувийн мал аж ахуйн фермийн газрыг чөлөөлөх, нүүлгэн шилжүүлэхтэй холбоотойгоор төрөөс олгох нөхөн төлбөрийг авч чадаагүйн улмаас маргаан үүсгэсэн байж болзошгүй гэж таамаглаж байна. 

Эх сурвалж:

• news.az

• newspress.mn

• news.mn

• gogo.mn

• newsable.asianetnews.com