Дани улс Украинд 665 сая еврогийн батлан хамгаалах болон эрчим хүчний тусламж үзүүлнэ
Украины Ерөнхийлөгч Володимир Зеленский Дани улсын нийслэл Копенхаген хотноо Хойд Европын орнуудын удирдагчидтай дээд хэмжээний уулзалт хийлээ. Уулзалтын үеэр Данийн Засгийн газар тус улсаас Украинд нийт 665 сая орчим евро буюу ойролцоогоор 742 сая ам.долларын өртөг бүхий батлан хамгаалах болон эрчим хүчний салбарын дэмжлэгийн шинэ багц олгохоо зарласан байна.
Кристиансборг ордонд зохион байгуулагдсан дээд түвшний хэлэлцээнд Дани, Швед, Норвеги, Финландын Ерөнхий сайд нар болон Исланд улсын төлөөлөгчид оролцов. Мөн Володимир Зеленский Данийн цог жавхлант хаан X Фредериктэй бараалхаж, тус улсын парламент болох Фолкетинг болон батлан хамгаалах салбарын тэргүүлэх аж ахуйн нэгжүүдийн төлөөлөлтэй ажил хэрэгч уулзалт өрнүүлсэн юм.
Данийн талаас баталсан 32 дахь удаагийн цэргийн тусламжийн багц нь 4.8 тэрбум крон буюу ойролцоогоор 645 сая еврогийн санхүүжилттэй гарчээ. Энэхүү санхүүжилтийг тагнуулын болон цохилтын нисгэгчгүй төхөөрөмж, дроны эсрэг саатуулагч систем худалдан авах, F-16 сөнөөгч онгоцны сум хэрэгсэл нийлүүлэхэд зарцуулахаар тусгасан байна. Түүнчлэн Европын санхүүжилтээр АНУ-д үйлдвэрлэсэн зэвсэг худалдан авах боломж олгодог НАТО-гийн PURL механизмыг дэмжихэд тодорхой эх үүсвэрийг төвлөрүүлжээ.
Цэргийн тусламжаас гадна эрчим хүчний дэд бүтцийг сэргээн босгоход зориулж 150 сая крон буюу 20 сая орчим еврогийн буцалтгүй тусламж олгохоор шийдвэрлэсэн байна. Энэ нь өвлийн хүйтэн улирал эхлэхээс урьтаж Оросын агаарын болон пуужингийн цохилтод өртсөн Херсон муж зэрэг бүс нутгийн дулааны болон ус хангамжийн станцуудыг засварлаж, хамгаалалтыг нь чангатгахад чухал үүрэг гүйцэтгэх юм. Түүнчлэн талууд Хойд Европын батлан хамгаалахын компаниудтай хамтарсан цэргийн үйлдвэрлэлийг өргөжүүлэх асуудлыг чухалчлан авч үзэв.
Скандинавын дээд хэмжээний уулзалт нь Абу Даби хотноо АНУ-ын зуучлалаар эхэлсэн гурван талт энхийн хэлэлцээтэй зэрэгцэн өрнөснөөрөө онцлогтой байлаа. Данийн Ерөнхий сайд Метте Фредериксен Европын аюулгүй байдлыг хамгаалахад Хойд Европын орнуудын нягт эв нэгдэл, урт хугацааны тогтвортой тусламж шийдвэрлэх үүрэгтэйг цохон тэмдэглэсэн бөгөөд цаашид ч цэргийн хамтын ажиллагааг эрчимтэй үргэлжлүүлэхээ мэдэгдсэн байна.
Эх сурвалж:
• sana.sy
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.