НОБГ-ын дарга, хурандаа А.Дашням: Нийслэл хотын хувьд жилийн дөрвөн улирлаа даган гамшгийн эрсдэл нь нэмэгддэг. Өвлийн цагт объектын түймэр ихэсдэг бол хаврын улиралд шар усны үер, өнжмөл өвсний түймэр, зуны улиралд гол ус, үерийн дуудлага тасрахгүй.

Он гарсаар өнөөдрийн байдлаар объектын гал түймрийн 739, аврах ажиллагааны 63 дуудлагад үүрэг гүйцэтгэсэн байгаа. Өнгөрсөн оны мөн үеийнхтэй харьцуулахад объектын гал түймэр 28.3, аврах ажиллагааны дуудлага 16 хувиар буурсан үзүүлэлттэй байгаа. Энэ маань Ковидтой холбоотой. Иргэдийн хувьд гэртээ байснаар бага насны хүүхэд харгалзах хүнтэй байсантай холбоотой.

Он гарсаар гал түймэрт 14 том хүн, зургаан хүүхэд амь насаа алдсан байгаа. Усанд осолдож, дөрвөн иргэн амиа алдсан байна. Мэргэжлийн байгууллагууд иргэдийн амь насыг хамгаалахыг тулд урьдчилан сэргийлэх ажил хэрэгжүүлж байна.

Зуны дэлгэр цагт ногоон бүс руу зорчиж, архи согтууруулах ундаа хэрэглэн, бага насны хүүхдийг хараа хяналтгүй байлгаснаар усанд эндэх тохиолдол байдаг гэдгийг санах хэрэгтэй. Түүнчлэн амиа хорлох, уул хадаар зугаалж яваад төөрөх дуудлагад НОБГ-ын албан хаагчид ажиллаж байна. Жилд дунджаар 20 орчим иргэн Туул голд амь насаа алддаг. Жил болгон усны эргүүл ажилласнаар усанд осолдох хэрэг багасдаг ч иргэд хайхрамжгүй байдлаасаа голд эндэж байна.

Хөдөөнөөс ирж суурьшиж байгаа иргэддээ анхааруулж хэлэхэд. Зөвшөөрөлгүй, зуны дэлгэр цагт зүлэг, ногоотой газар худалдан авдаг ч өвөл нь халиа дошио үүсэх зөрчил гардаг. Тэгэхээр хашаа байшин худалдан авахдаа хорооны Засаг даргаас асууж, Гамшгийн эрсдэлийн атлас зэргийг харж хаана хамгийн их эрсдэлтэй газрын мэдээллийг авах хэрэгтэй. Энэ зун үер усны аюул нүүрлэж болзошгүй тул анхаарууштай.

---