Улаанбаатар хотод 3 дугаар сарын 10-наас сурагчид танхимаар хичээллэхгүй

Сургууль, цэцэрлэгийг гуравдугаар сарын 10-наас шат дараатай нээх Монгол улсын Засгийн газрын шийдвэр гарсан. Үүн дээр ойлголтын зөрүү гарч, Монгол орон даяар танхимаар хичээллэнэ гэсэн ташаа ойлголт байгааг өнөөдрийн УОК-ын мэдээллээр залрууллаа. 

ДЭМБ-аас өгсөн зөвлөмжийн дагуу 21-ээс дээш хоног халдвар илрээгүй бүсийг "ногоон бүс" хэмээн зарлаж байгаа. Монгол орны 21 аймагт сүүлийн 21 хоногт халдвар илрээгүй учир тус аймгуудад сургууль, цэцэрлэгийг гуравдугаар сарын 10-наас шат дараатай нээх Засгийн газрын шийдвэр гарчээ. 

Харин Улаанбаатар хотын сургууль, цэцэрлэгийн хувьд гуравдугаар сарын 10-наас нээгдэхгүй гэдгийг өнөөдөр албан ёсоор анхааррууллаа. "Нэг хаалга-Нэг шинжилгээ"-ний хүрээнд шинээр 13 голомт илэрсэн, халдвар дахин илрэх өндөр магадлалтай хэд хэдэн хороо /дэлгэрэнгүй уншина уу/ байгаа учир халдварын голомтод дахин дүгнэлт хийж, сургууль, цэцэрлэгийг нээх эсэхийг Засгийн газар шийдвэрлэнэ хэмээн УОК-оос мэдээллээ. 

Өөрөөр хэлбэл, Улаанбаатар хот "ногоон бүс" болж чадаагүй байгаа учир танхимаар хичээллэх цаг нь болоогүй гэж Монгол улсын Засгийн газар үзэж байна.