БНСУ: Түргэний машиныг хаасан таксины жолооч хоёр жилийн хорих ял сонсжээ

Яаралтай тусламж шаардлагатай өвчтөнийг тээвэрлэж байсан түргэн тусламжийн машиныг хааж саатуулан, олон нийтийн дургүйцлийг хүргээд байсан Сөүлийн таксины жолоочийг орон нутгийн шүүх өнөөдөр хоёр жилийн хорих ялаар шийтгэжээ.

Сөүл хотын дүүргийн шүүх 31 настай таксины жолоочийг бусдын биед халдсан, залилан хийсэн болон бусад зүйл ангийн хэрэгт буруутган, хоёр жилийн хорих ял оноосон байна. 

Чой овогтой энэхүү жолооч эрэгтэйг өнгөрсөн зургадугаар сарын 8-ны өдөр Сөүлийн зүүн өмнөд хэсгийн зам дээр түргэн тусламжийн машинтай санаатайгаар мөргөлдөж, 10 минут орчим явуулалгүй хааж саатуулаад, түргэний машины жолоочийг өвчтөнөө эмнэлэгт хүргэж өгөхөөсөө өмнө ослын асуудлаа шийдэхийг шаардсан аж.

Түргэний машинд байсан 79 настай өвчтөн уушгины хорт хавдрын 4-р шаттай байсан бөгөөд эмнэлэгт хүргэгдсэнийхээ дараа нас барсан гэнэ.

Таксины жолооч ослын үеэр "Хэрэв өвчтөн нас барвал би хариуцлага хүлээнэ" гэж хэлсэн болохыг талийгаач өвчтөний хүү Хөх ордны вэбсайт дээр нийтэлсэн өргөдөлдөө дурдсан байна.

Мөрдөн байцаалтын явцад уг жолооч 2015-2019 оны хооронд үүнтэй ижил төрлийн зургаан автомашины ослыг санаатайгаар үйлдэж, бусад хохирогчдоос 20 орчим сая воныг салгасан болох нь тогтоогджээ. Прокуророос түүнийг гэмт хэрэг үйлдэхдээ огт гэмшээгүй бөгөөд давтан зөрчил гаргах магадлалтай гэсэн үндэслэлээр долоон жилийн хорих ял оноохыг шаардсан аж.

Тэгвэл шүүхээс "Яллагдагч нь олон жилийн турш жолооны бизнес эрхлэхдээ автомашины осол санаатайгаар үйлдэж байсан бөгөөд хохирогчдоос мөнгө авах зорилгоор бага зэргийн ослын улмаас эмчилгээ хийлгэх шаардлагатай мэт дүр эсгэсэн. Түүний гэмт хэргийн шинж чанар хүнд" хэмээн мэдэгдсэн байна.

Гэсэн хэдий ч шийтгэх баримтад зургадугаар сард болсон осол болон түргэний машинд байсан өвчтөний үхэл хоёрын харилцан хамаарлыг үндэслэн яллах дүгнэлт үйлдээгүй тул шүүхээс тус ослыг харгалзаж үзээгүй гэж тайлбарлажээ. 

Үүний талаар хохирогчийн гэр бүлийн өмгөөлөгч "Энэхүү шийтгэх тогтоолд талийгаач болон түүний гэр бүлийн зовлон шаналлыг үнэн зөвөөр тусгаагүй" хэмээн мэдэгдсэн юм. Одоо талийгаачийн гэр бүлийнхэн Чойд хүний амь хөнөөсөн гэх үндэслэлээр тусдаа эрүүгийн хэрэг үүсгээд байгаа бөгөөд энэ талаарх цагдаагийн мөрдөн байцаалт үргэлжилж байгаа аж.

Эх сурвалж: Yonhap News Agency