Хонконг-Макаог холбосон далайн гүүр нээгдлээ

Далай тэнгисээр дамжин хуурай газрыг холбосон дэлхийн хамгийн урт гүүр өнөөдөр нээлтээ хийлээ. Хонконг-Жухай-Макаог холбосон 55 км урт гүүр маргаашнаас буюу аравдугаар сарын 24-ний өдрөөс ашиглалтад орно.

Өнөөдөр өглөө Жухай хотод болсон нээлтийн арга хэмжээнд Хятадын дарга Си Зиньпин оролцсон байна. Мөн Гуандон, Хонконг, Макаогийн өндөр дээд албан тушаалтнууд нээлтийн арга хэмжээнд байлцлаа.

Тус гүүрийг таван жил төлөвлөж, есөн жил барихад 20 тэрбум ам.доллар зарцуулж, 50,000 хүн ажилласан.

Хонконг, Макаогийн тусгай бүсийг авто замаар холбосноор эдийн засаг, худалдаа, тээвэр зуучлал болоод аялал жуулчлалыг хөгжүүлэхэд маш том түлхэц болно гэж хүлээж байна. Аялагчид эдгээр гурван газрыг ердөө нэг цагийн дотор тойрох боломжтой боллоо.

Хувийн автомашинуудад тусгай зөвшөөрөл олгоно

Гүүрээр тогтмол цагт явдаг автобусууд, ачаа тээврийн машинууд зорчино. Харин хувийн машинаараа явах бол эхлээд тусгай зөвшөөрөл авах ёстой байна.

Мөн олон нийтийн тээврийн хэрэгсэл одоогоор үйлчлэхгүй гэжээ. Эхний үед ачаалал ихтэй байх ч 2030 он гэхэд гүүрний ачаалал буурна гэж төлөвлөсөн байна. Учир нь 10 гаруй жилийн дараа дахин нэг гүүр барина гэж тооцжээ.

Гүүрэн дундуур гаргасан газар доорх 6,7 км хонгилын хоёр захад хиймэл арлууд хийж холбосон байна. Ингэснээр усан замын тээвэр хийж байгаа завь, хөлөг онгоцуудын урсгал хөдөлгөөнд саад болохгүй гэжээ.

Тусгай бүсүүдийг Хятадад уусгах гэж байна уу?

Дотооддоо эдийн засаг, нийгмийн асуудлаа шийдэх эрхтэй тусгай бүс Хятадад хоёр бий. Коммунист намын эрх баригчид тусгай бүсүүдийн холбоо харилцааг сайжруулж, тээвэр зуучлалыг хялбарчилж байгаа нь уусган нэгдүүлэх гэсэн санаа байж болох юм гэж хардаж сэрдэх ажиглагчид байна.

Нөгөө талаас гүүрний бүтээн байгуулалтын ажлыг далайн ховор амьтдын нэг төрөл цагаан далайн гахайн тоо толгойг бууруулна гэж эсэргүүцжээ. Хонконгчуудын зүгээс татварын санг дэмий зүйлд зарцууллаа хэмээн шүүмжилж байна.

Өрнөдийн хэвлэл  мэдээллийн хэрэгслээр гүүрээр зорчих иргэдийн аюулгүй байдлыг хэрхэн хамгаалах талаар хөндөн бичжээ.

Эх сурвалж: www.theguardian.com, www.chinadaily.com.cn