Хунтайж Харри гэр бүлийн хамт хилийн чанадад айлчилж байна
Их Британийн хунтайж Харри өнгөрсөн тавдугаар сард хуримаа хийснээс хойш анх удаа гэр бүлийн хамт хилийн чанадад албан айлчлал эхлүүллээ. Сассексын гүн болон гүнгийн авхай 16 хоногийн турш Австрали, Фижи, Тонга, Шинэ Зеланд улсуудаар айлчлах юм.
Австралийн Сидней хотод хунтайж Харригийн санаачилсан Инвиктус паралимпын наадам бямба гарагт эхэлнэ. Хунтайжийн гэр бүл наадмын нээлт, хаалтын арга хэмжээнд оролцоно. Инвиктус паралимпын наадамд дайны үеэр шархадсан баатрууд, ахмад дайчид спортын 11 төрөлд өрсөлдөх юм.
Үүнээс гадна залуу гэр бүл албан ёсны олон арван арга хэмжээнд оролцоно. Өнөөдөр тэд Австралид ирээд багахан амралт авна гэжээ.
Австрали нь хамтын нийгэмлэгийн бие даасан улс боловч эзэн хаант засаглалд багтдаг. Тиймээс Их Британийн хатан хаан хоёрдугаар Элизабетын гэр бүл нэр хүндтэй хэвээр байдаг юм. Саяхан болсон гүнж Эженийн хуримыг сая гаруй Австрали иргэн телевизээр үзсэн бол өнгөрсөн тавдугаар сард болсон хунтайж Харригийн хуримыг дөрвөн сая иргэн үзжээ. Энэ нь Австраличууд 16,000 км-ын холоос ч улсын тэргүүнээ дэмжсээр байгаагийн илрэл юм.
Хатан хааны удмын шинэхэн гэр бүлийн анхны албан айлчлал Шинэ Зеландад дөрөв хоносноор өндөрлөнө. Өндөрлөхөөсөө өмнө Фижи, Тонга арлын орнуудад хөл тавина.
Кэмбрижийн гүн хунтайж Уильям болон гүнгийн авхай Кэйт Мидлтон нар 2014 онд Австрали, Шинэ Зеланд улсуудад 18 хоногийн айлчлал хийж байжээ.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.