Альберто Фужиморид үзүүлсэн өршөөлийг цуцлав
Перу улсын экс Ерөнхийлөгч Альберто Фужиморид өнгөрсөн жил өршөөл үзүүлсэн боловч Засгийн газар ахмад дарангуйлагчид олгосон өршөөлийн хуулиа цуцаллаа. Үүний дараа Фужиморигийн бие муудаж түргэний машинаар эмнэлэгт хүргүүлжээ. Эрх баригчид түүнийг нэн даруй баривчилж, хорих газар луу буцаахаар шийдсэн байна.
Альберто Фужиморигийн өмгөөлөгч Мигуэл Перез давж заалдах шатны шүүхэд хандаж, баривчлах тушаалаа түдгэлзүүлэхийг хүссэн байна. Экс Ерөнхийлөгчийн зүрх муу байгаа тул дахин хоригдвол амь насаа алдах аюултай гэжээ. Фужиморигийн хүү твиттертээ “Өнөөдөр би тантай хамт дахин түргэний машинд явж байна. Үнэхээр гунигтай” гэсэн байжээ.
1990-ээд оны үед төрийн эрх барьж байхдаа хууль бусаар орлого олж, хүний эрхийг зөрчиж байсан гэж буруутгагдсан Фужиморид 2007 онд 25 жилийн хорих ял оноосон. Гэвч өнгөрсөн жил төрийн тэргүүн байсан Педро Пабло Кученьский өнгөрсөн жилийн зул сарын баярын өмнөх орой өршөөл үзүүлсэн. Энэ нь экс Ерөнхийлөгчийн биеийн байдлаас болсон гэж тайлбарласан ч бодит байдал дээр улс төрийн наймаа байсан гэж хардаг. Учир нь Фужиморид өршөөл үзүүлснээр Педро Пабло Кученьский итгэл үзүүлэх Конгрессийн санал хураалтад Фужиморигийн намаас дэмжлэг авсан юм.
Эх сурвалж: www.reuters.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.