Эрх баригчид ЖДҮ-чдийг уучлахаар шийджээ

Эрх баригч МАН-ынхан ЖДҮ-чдэдээ хариуцлага тооцохгүй, тэднийг уучлахаар шийдсэнээ УИХ-ын гишүүний Халдашгүй дэд хорооны өнөөдрийн шийдвэрээр харууллаа.

Оны өмнөхөн Хууль зүй, дотоод хэргийн сайд Ц.Нямдорж:

-ЖДҮХС-аас зээл авсан гишүүд, сайд нарын асуудлыг хуулийн байгууллага шалгаад, багцлаад санал оруулаад ирнэ биз дээ. Энд холбогдсон гишүүдийг ёс зүйн хувьд хэзээ ч уучлахгүй. Хуулийн асуудал эцэслээд, бүрэн эрхийн асуудал хөндөгдвөл яг номоор нь хандана, би. Өмөөрөхгүй гэж хэлж байсныг сануулъя.

Гэтэл өнөөдөр түүний байр суурь өөрчлөгдөж, “шударга үгтэй” гэсэн имижээсээ дахин нэг алхмаар ухарлаа.

Халдашгүй байдлын дэд хороог УИХ-д олон жил сууж байгаа, эерэгээр хэлбэл туршлагатай, сөргөөр хэлбэл УИХ-д буг болтлоо суусан архагууд бүрдүүлж байгаа. Ард түмэн дэд хороог бүрдүүлдэг Ц.Нямдорж, Д.Лүндээжанцан, Ө.Энхтүвшин, Ч.Улаан, Н.Энхболд нараас шударга ёс хүлээхгүй юм бол өөр хэнээс хүлээх юм бэ?

Хоёрхон сарын өмнө “Өмөөрөхгүй, номоор нь хандана” гэж ярьж байсан хүний ярьсан хэлснийх нь бэх нь хатаагүй байхад өнөөдөр шийдвэрээсээ буцаад, “Мөрдөн байцаах байгууллага шалгалтаа дуустал УИХ-ын гишүүдийг түдгэлзүүлэх шаардлагагүй ” гэж үзлээ.

Улсын Ерөнхий прокурор М.Энх-Амгалан, ХХААХҮ-ийн сайд Б.Батзоригийн бүрэн эрхийг түдгэлзүүлж асуудлаар УИХ-д хандахдаа яагаад УИХ-ын гишүүнийг эрхээс нь түдгэлзүүлж шалгах ёстой вэ гэдгийг тодорхой тайлбарласан.

УИХ-ын гишүүн, жирийн иргэн хоёрыг шалгах явц өөрөө маш өөр. Жирийн иргэнийг шалгах шаардлага үүссэн ямар ч үед дуудаж, эсвэл цагдан хорьж болдог бол УИХ-ын гишүүн дархан эрхтэй субьект. Түүнийг хүссэн үедээ дуудаж, мөн шаардлагатай гэвэл цагдан хорьж шалгаж болдоггүй. Улстөрийн зорилгоор намайг шалгах гээд байна гээд мэдүүлэг өгөхгүй байж ч болно. Иймд гишүүдийг заавал ч үгүй бүрэн эрхээс нь түдгэлзүүлж, жирийн иргэний хэмжээнд аваачиж байж шалгах шаардлага үүсдэг.

Ийм байдал үүссэн учраас Прокурорын байгууллага Г.Солтан, Б.Ундармаа, Д.Дамба-Очир, Л.Энхболд нарын дөрвөн гишүүний бүрэн эрхийг түдгэлзүүлж өгөөч хэмээн УИХ-д хандаад, өнөөдөр хоншоороо тас татууллаа.

Эрх баригчид Засгийн газрын түвшинд ч, УИХ-ын түвшинд ч ЖДҮ-чидтэй хариуцлага тооцох сонирхолгүй байгаа нь ингэж харагдлаа. Маргааш Ерөнхий сайд гарч ирээд “ЖДҮ авсан гишүүдтэй хариуцлага заавал тооцно. ЖДҮ-чидтэй хариуцлага тооцох гэсэн боловч Халдашгүй байдлын дэд хороо зөвшөөрөөгүй байна лээ. Хуулиа дагахаас өөр аргагүй” гэж урьдын адил гоё тайлбар тавиад олны амыг таглаж мэдэх юм.

Ер нь ч ингэх байх.