АНУ, Мексик, Боливи улс улаанбурхан өвчнийг устгасан статусаа алдлаа
Дэлхийн эрүүл мэндийн байгууллагын бүсийн салбар болох Пан Америкийн эрүүл мэндийн байгууллагаас (PAHO) АНУ, Мексик болон Боливи улсууд улаанбурхан өвчний тархалтыг бүрэн таслан зогсоосон статусаа алдсаныг албан ёсоор мэдэгдлээ. Тус байгууллагын хяналтын хараат бус зөвлөл тархвар зүйн мэдээлэлд дүн шинжилгээ хийсний үндсэн дээр уг шийдвэрийг 2026 оны арваннэгдүгээр сарын 17-ны өдөр баталгаажуулсан байна. Олон улсын эрүүл мэндийн стандартын дагуу вирусийн нэг омог 12 ба түүнээс дээш сарын турш тасралтгүй тархсан нөхцөлд уг өвчнийг бүрэн устгасан гэх батламжийг хүчингүйд тооцдог журамтай.
АНУ-ын хувьд 2000 онд улаанбурханы тархалтыг зогсоосон улсаар хүлээн зөвшөөрөгдөж байсан бөгөөд 26 жилийн турш хадгалсан ололт амжилтаа ийнхүү алдлаа. 2025 оны нэгдүгээр сард эхэлсэн халдварын дэгдэлт нэг жил гаруй хугацаанд үргэлжилсэн нь тус улсад 1991 оноос хойш тохиолдоогүй хамгийн өргөн цар хүрээтэй дэгдэлт болж байна. Зөвхөн 2026 онд тус улсад 5,400 гаруй тохиолдол батлагдаж, 10 хүн нас барсан бол өвчилсөн иргэдийн 96 хувь нь вакцин хийлгээгүй эсвэл дархлаажуулалтын мэдээлэл нь тодорхойгүй байжээ. Нийт бүртгэгдсэн өвчлөлийн 18 хувийг тав хүртэлх насны хүүхдүүд, 40 хувийг 5-аас 19 насны өсвөр үеийнхэн эзэлж байгаа юм.
Мексик улсад ч нөхцөл байдал хүндэрч, 2026 онд 13,800 гаруй батлагдсан тохиолдол бүртгэгдсэн нь 1989-1990 оны тархалтаас хойших хамгийн дээд үзүүлэлтэд хүрэв. Дэгдэлтэд 1-4 насны багачууд хамгийн ихээр өртөөд байна. Харин Боливи улсад 100 гаруй тохиолдол бүртгэгдсэнээр тасралтгүй тархалтын шалгуурт хүрч, дээрх хоёр улсын хамт жагсаалтаас хасагдахад хүрчээ. Америк тив 2016 онд улаанбурхан өвчний тархалтыг бүрэн устгасан дэлхийн анхны бүс нутаг болж байсан хэдий ч 2025 онд Канад, улмаар энэ онд гурван улс статусаа алдсанаар вирусийн эндемик тархалт бүс нутагт эргэн сэргэлээ.
Дархлаажуулалтын хамрагдалт буурсан, вакцин хийлгэхээс татгалзах хандлага нэмэгдсэн болон улаанбурхан, гахайн хавдар, улаануудын (MMR) эсрэг хоёр тунт вакцины хувь хэмжээ унасан нь энэхүү дэгдэлтийн гол шалтгаан болжээ. НҮБ-ын Хүүхдийн сангийн Гүйцэтгэх захирал сэргийлэх боломжтой халдварын улмаас хүүхдийн амь нас дахин эрсдэлд орж байгаад харамсаж буйгаа илэрхийлсэн юм. PAHO-ийн захирал Жарбас Барбоса халдварын тандалт судалгааг чангатгаж, дархлаажуулалтын түвшинг нэн даруй ахиулахыг гишүүн улсуудад уриалав.
Цаашид нэр дурдагдсан гурван улс тогтмол вакцинжуулалтыг сайжруулах, дэгдэлтийн голомтыг хязгаарлах арга хэмжээний нарийвчилсан төлөвлөгөөгөө PAHO-д танилцуулах үүрэгтэй.
Эх сурвалж:
• paho.org
• cbc.ca
• paho.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.