Өвөрхангайн Засаг дарга асан А.Ишдоржийн хэргийг дахин шийдвэрлүүлэх нь

Ингэхдээ А.Ишдоржийн хувийн байдлыг гүйцэд тогтоогоогүй, албан тушаалын болон тээврийн хэрэгсэл жолоодож яваад хүн дайрч амийг нь бүрэлгэсэн зэрэг хэрэгтээ ямар шийтгэл ногдуулсныг тусгаагүй. Эрүүгийн хуулийн ерөнхий ангийн 6.8-ын хэд хэдэн гэмт хэрэг үйлдсэн хүнд ял оноох, 6.9-ын хэд хэдэн шийтгэх тогтоолоор ял оногдуулах заалтыг хэрэгжүүлээгүй гэж дүгнэн анхан шатны шүүхийн шийтгэх тогтоолыг хүчингүй болголоо.

Улмаар А.Ишдорж, Т.Баатарсүрэн нарт авсан цагдан хорих таслан сэргийлэх арга хэмжээг хэвээр үргэлжлүүлэхээр шийдвэрлэсэн юм. А.Ишдорж нь дээрх албан тушаалыг хашиж байхдаа “Бако констракшн” компанийн гүйцэтгэх захирал Т.Баатарсүрэнгээс 10 сая төгрөгийн хахууль авсан гэх хэрэгт холбогдсон юм. “Бако констракшн” компани нь Өвөрхангай аймгийн Бат-Өлзий сумд 15 ортой Эрүүл мэндийн төвийн өргөтгөлийн барилгыг нэг тэрбум 356 сая төгрөгөөр барихаар болж, ажил гүйцэтгэх гэрээ байгуулсан байдаг. Аймгийн Засаг даргаар ажиллаж байхдаа А.Ишдорж албаны чиг үүргээ хэрэгжүүлсний хариуд тус компанийн захирал Т.Баатарсүрэнгээс эхнэрийнхээ төрсөн дүү Отгонбаатарын ХААН банкны дансаар дамжуулан хахуулийн мөнгөө авсан хэрэгт буруутгагдсан.

Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүх өнгөрсөн есдүгээр сарын 4-нд уг хэргийг хэлэлцээд А.Ишдоржийг улс төрд нөлөө бүхий албан тушаалтан хахууль авсан гэм буруутайд тооцож, нийтийн албанд ажиллах эрхийг бүх насаар нь хасаж, 12 жил нэг сарын хугацаагаар хорих ял шийтгэсэн. Харин Т.Баатарсүрэнг хахууль өгсөн гэм буруутайд тооцон нийтийн албанд ажиллах эрхийг нь гурван жил хасан, хоёр жил хорих ял оноогоод байсан юм.