Мукбанг бичлэг хүний мэдрэлийн тогтолцоонд хэрхэн нөлөөлдөг болохыг тайлбарлав

Цахим орчинд их хэмжээний хоол идэж буй бичлэг буюу мукбангийн үзэгдэл яагаад олон нийтийн дунд өндөр хандалт авдаг, энэ нь хүний мэдрэлийн тогтолцоонд хэрхэн нөлөөлдөг талаар нейропсихологичид ийн тайлбарлав. Хооллох үйл явцыг үзэх нь хүнийг тайвшруулах сэтгэл зүйн тодорхой учир шалтгаантай байдаг ажээ.

Мэргэжилтний онцолсноор хоол идэж буй бичлэг үзэх үед хүний мэдрэлийн систем тайвширч, хуримтлагдсан бухимдал арилах боломжтой гэнэ. Энэ нь бичлэгийн дуу авианы бүтэцтэй шууд холбоотой бөгөөд хоол зажлах, шаржигнах, буцлах болон хөөс хагарах чимээ зэрэг хэмнэлтэй нам давтамжийн чимээнүүд нь бие махбодод автономит мэдрэхүйн хариу үйлдэл (АСМР) үүсгэдэг байна. Ийм авиа чимээ нь мэдрэлийн тогтолцоонд шууд нөлөөлж, байгалийн жамаар тайвшрах нөхцөлийг бүрдүүлдэг байна.

Үүний зэрэгцээ хоол хүнс нь хүний биеийн анхдагч суурь хэрэгцээнд тооцогддог. Суурь хэрэгцээгээ хангах мөчид хүний биед баяр баяслын даавар ялгарч, сэтгэл ханамж мэдрэгддэг онцлогтой.

Биологийн хувьд хүн төрөлхтөн ийнхүү хоол хүнснээс авах баяр цэнгэл, таашаалаа бусадтай хуваалцах төрөлхийн зан төлөвтэй байдаг тул бусдын хооллож буйг харах төдийд таатай мэдрэмж авдаг гэдгийг судлаач тайлбарласан байна.

Түүнчлэн мукбанг контент нь ганцаардлыг даван туулах болон нийгмийн харилцаанд оролцох хэрэгцээг илэрхийлдэг хүчин зүйл юм. Бичлэг бүтээгчид хооллох үйл явцаа бусадтай хуваалцах сэдлээр дүрс бичлэг хийдэг бол үзэгчид ямар нэг бүлгийн нэг хэсэг байх, бусадтай хамт байгаа мэт сэтгэгдэл авахыг эрмэлздэг. Өөрөөр хэлбэл, дэлгэцийн цаанаас хэн нэгэнтэй хамт өдрийн, эсвэл оройн хоолоо хуваалцаж байгаа мэт хийсвэр мэдрэмжийг бий болгодог байна.

Гэсэн хэдий ч нейропсихологичид энэхүү виртуал үзэгдэл нь бодит амьдрал дахь нийгмийн амьд харилцааг орлох ёсгүйг хатуу анхаарууллаа. Хэрэв хүн бодит амьдрал дээрх хүмүүстэй харилцахаас санаатайгаар зайлсхийж, зөвхөн дэлгэцийн цаана хооллох бичлэг үзэн ганцаардлаа нуух болсон бол энэ нь сэтгэл зүйн асуудал үүссэний ноцтой дохио юм. Тиймээс бодит ертөнцөөс дайжих шалтгааныг олж тогтоох, цахим орчин дахь хамаарлаа тэнцвэржүүлэх шаардлагатай гэж үзжээ.

Эх сурвалж:

• nsn.fm

• gazeta.press