Боливид зуу гаруй жилийн дараа муурын шинэ зүйл илрүүлжээ
Шинжлэх ухааны салбарт сүүлийн нэг зуу гаруй жилийн хугацаанд анх удаа муурын овгийн цоо шинэ зэрлэг амьтны төрөл зүйлийг албан ёсоор бүртгэж, тодорхойлсон тухай "Current Biology" сэтгүүлд нийтлэгджээ.
Боливи улсын нутаг дэвсгэрээс олдсон энэхүү шинэ амьтанд нутгийн уугуул иргэдийн уламжлалт нэршлийг хүндэтгэн "Leopardus tilcayo" буюу тилкайо зэрлэг муур хэмээх шинжлэх ухааны нэр өгчээ.
Тилкайо зэрлэг муур нь Боливийн Юнгас бүсийн чийглэг, өтгөн манантай уулын ойд нутагладаг. Гадаад төрхийн хувьд гэрийн муурын хэмжээтэй жижигрүүлсэн ирвэсийг санагдуулам бөгөөд цайвар хүрэн зүстэй, биеэрээ тод хар толботой, шантгардуу хошуу, дугуй чих, урт сахалтайгаараа онцлог юм. Түүнчлэн биеийн жин нь ойролцоогоор 1.5-аас 2 килограмм буюу жирийн тэжээвэр муурнаас ч жижиг, биеийн урт нь 50 сантиметр орчим, сүүлний урт нь 25 сантиметр хүрдэг байна.
Шинэ зүйлийг нээх үйл явц 2016 оноос эхлэлтэй ажээ. Тухайн үед "Senda Verde" байгаль хамгааллын хүрээлэнд замын дэргэдээс олдсон сонин зүс бүхий муурын зулзага ирсэн бөгөөд нэгэн иргэн түүнийг тэжээвэр муур гэж андууран жилийн турш өндөг, будаа, гоймонгоор тэжээж байгаад зэрлэг араншинтай болохыг нь мэдэн хүлээлгэн өгсөн байна. Уг амьтныг Боливийн зэрлэг муур судлалын хөтөлбөрийг үндэслэгч, биологич эхэндээ умард барын муурын нэгэн өвөрмөц хувилбар гэж таамаглаж байжээ.
Улмаар генетикийн нарийвчилсан судалгаа болон ДНХ-ийн шинжилгээгээр тилкайо зэрлэг муур нь ойролцоогоор 1.4 сая жилийн өмнө ижил төрлийн бусад зэрлэг муурнуудаас салж тусдаа хөгжсөн болох нь нотлогджээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.