Эрдэмтэд хүний тархины эд эс бүхий лабораторийн хулгана гарган авчээ
Стэнфордын Анагаах ухааны сургуулийн эрдэмтэд хүний тархины гадаргын эд эсийг амжилттай шилжүүлэн суулгасан лабораторийн хулгана хөгжүүлснээ "Nature" шинжлэх ухааны сэтгүүлд нийтэллээ.
Доктор Сержиу Пашкагаар ахлуулсан судалгааны баг генетикийн аргаар их тархины хөгжил нь зогссон амьтанд хүний үүдэл эсээс ургуулсан бүтцийг залгаснаар уг эсүүд амьд биетэд бие даан тэлж, хэвийн ажиллах боломжтойг туршилтаар нотолсон байна.
Судлаачид эхлээд их тархи болон гиппокампын хөгжилд чухал үүрэгтэй генийг устгаж, тархины гадаргын мэдрэлийн эсийн 98 орчим хувь нь бүрэлдээгүй хулгануудыг бий болгожээ. Үүний дараа хүний арьсны эсээс гарган авсан үүдэл эсүүдийг лабораторийн нөхцөлд гурван хэмжээст органоид буюу бичил эд болгон бойжуулж, дөнгөж төрсөн хулгануудын гавлын хөндийд шилжүүлэн суулгасан аж. Улмаар гурван сарын дотор суулгасан эсүүд хүрээгээ тэлж, судсархан бэхжсэнээр хулганын их тархины гадаргын эзэлхүүний 91.9 хувийг буюу ойролцоогоор дөрвөн сая мэдрэлийн эсийг дангаар бүрдүүлжээ. Энэ нь амьтны нийт тархины эзлэхүүний тал хувьтай тэнцэх үзүүлэлт болсон юм.
Туршилтын явцад хүний тархины эдүүд хулганын доод бүтцүүдтэй цахилгаан дохионы холбоо тогтоож, нугасны тогтолцоо руу аксон сэртэнгүүдээ гүн оруулсан нь батлагдлаа. Түүнчлэн хулганын бие махбодын амьд орчин нь хүний тархины ховор төрлийн эсүүд аяндаа бий болох нөхцөлийг бүрдүүлсэн байна. Тухайлбал, урьд өмнө зөвхөн нас барсны дараах задлан шинжилгээгээр л илрүүлэн судалдаг байсан, тархины урд хэсгийн демент өвчний үед хамгийн түрүүнд гэмтдэг "Фон Экономо" урт сэртэнт эсүүд болон холын зайн мэдээлэл дамжуулах үүрэгтэй тусгай мэдрэлийн эсүүд амьд бие дотор амжилттай ялгаран хөгжжээ.
"Ксенокортикал хулгана" гэж нэрлэсэн энэхүү амьд загвар нь хүний мэдрэл, сэтгэцийн олон төрлийн өвчнийг нарийвчлан оношлох, шинэ эм бэлдмэл турших цоо шинэ боломжийг нээж байна. Эрдэмтэд уг аргыг ашиглан аутизм, шизофрени, эпилепси, тархины саажилт болон хүчилтөрөгчийн дутагдлаас үүдэлтэй тархины эмгэгүүдийг амьд биетийн түвшинд судлахаар төлөвлөж буй юм. Доктор Пашкагийн онцолсноор, цаашид тухайн өвчтөний өөрийнх нь эсээс ургуулсан органоидыг хулганад шилжүүлэн суулгах замаар хувь хүнд тохирсон эмийн эмчилгээг урьдчилан турших ч бүрэн боломжтой ажээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.