Б.Батцэцэг:

Засгийн газрын хуралдаанаар Хууль зүй, дотоод хэргийн салбарт үүсээд буй цаг үеийн нөхцөл байдалтай холбогдуулан ХЗДХ-ийн сайд С.Амарсайханыг үүрэгт ажлаас нь чөлөөлөх шийдвэр гаргалаа.

Сүүлийн өдрүүдэд тус салбарын сайд болон харьяа байгууллагуудын хооронд ноцтой гэмт хэргийн талаар харилцан мэдээлэл хийж, үүссэн нөхцөл байдлын улмаас дотоодын аюулгүй байдлыг хангах үйл ажиллагаанд эрсдэл учирсан төдийгүй хууль сахиулах байгууллагад итгэх иргэдийн итгэл алдрах асуудал үүссэн гэж үзжээ. Иймд Монгол Улсын Ерөнхий сайд хуулиар олгогдсон бүрэн эрхийнхээ хүрээнд салбарын сайдыг чөлөөлөх шийдвэрийг Засгийн газрын хуралдаанаас гаргасан байна.

Мөн уг асуудалтай холбогдуулан сүүлийн хоёр өдрийн турш олон нийтэд нэр нь дурдагдсан, өөрсдөө мэдэгдэл хийсэн Цагдаа, Шүүхийн шийдвэр гүйцэтгэх газар зэрэг холбогдох агентлаг, байгууллагын дунд болон дээд шатны албан тушаалтнуудыг үүрэгт ажлаас нь чөлөөлж, шалгуулах үүргийг Ерөнхий сайд өгчээ. Ингэснээр үнэн мөнийг нь хуулийн дагуу тогтоолгож, олон нийтэд үүсээд буй эргэлзээг арилгах чиглэл баримталж буйг мэдэгдлээ.

Хууль зүй, дотоод хэргийн сайдын дараагийн томилгоо хийгдэх хүртэл Засгийн газрын танхимын аль нэг сайд тус яамны сайдын үүргийг түр орлон гүйцэтгэх бөгөөд одоогоор хэн ажиллах нь тодорхойгүй байна.