Нигери улсад нууц лабораториуд байгуулсан Мексикийн хар тамхины сүлжээг илрүүлжээ
Нигерийн Хар тамхитай тэмцэх үндэсний агентлаг (NDLEA) тус улсын нутаг дэвсгэрт метафетамин үйлдвэрлэх томоохон сүлжээ байгуулсан Мексикийн гэмт бүлэглэлийн гол зохион байгуулагчийг баривчилж, нууц лабораториудыг татан буулгаснаа зарлалаа. Баривчлагдсан Артуро Каррера Лоайза хэмээх этгээдийг өнгөрсөн наймдугаар сарын 19-нд Лагос хотын олон улсын нисэх онгоцны буудлаас хил даван зугтах гэж байхад нь барьжээ.
Мөрдөн шалгах ажиллагаа хэдэн сарын өмнөөс эхэлсэн бөгөөд гэмт бүлэглэл үйл ажиллагаагаа хотоос алслагдсан ой мод, хөдөөгийн суурин руу шилжүүлж эхэлснийг тагнуулын мэдээллээр илрүүлжээ. Агентлагийн ажилтнууд тавдугаар сарын 16-нд Огун мужийн ойн бүс дэх нуувчийг шалган нэгжлэг хийж, Мексикийн гурав, Нигерийн долоон иргэнийг саатуулсан юм. Үүний дараа зургаадугаар сарын 17-нд Ойо мужийн Тапа тосгоны ойд байрлах нууц лабораторийг илрүүлж, метафетамин бэлтгэгч 56 настай Мексик мэргэжилтэн Хосе Вилла Очоаг дөрвөн хамсаатных нь хамт баривчилжээ. Очоа нь Лоайзаг Мексикээс өөрийг нь хөлсөлж, хууль бус бодис үйлдвэрлүүлэхээр Нигери рүү илгээсэн зохион байгуулагч мөн болохыг гэрэл зургаар нь таньж нотолсон байна.
Мөрдөгчид Лоайзагийн байршлын тоон өгөгдөл, хяналтын камерын бичлэг болон химийн боловсруулалтын төхөөрөмж бүхий лабораторид халадтай зогсож буй зургуудад дүн шинжилгээ хийснээр дараагийн үйлдвэрийг тогтоожээ. Уг нотлох баримтын мөрөөр Эбони мужийн нэгэн барилгын талбайд нэгжлэг хийж, хүчин чадал бүхий нууц лабораторийг бүрэн зогсоосон байна. Ажиллагааны явцад 442.8 килограмм ацетон, 31.5 килограмм давсны хүчил, метафетамин хатаагч төхөөрөмжүүд болон их хэмжээний химийн урьдал бодисуудыг хураан авчээ.
Сэжигтэн Лоайза байцаалтын явцад метафетамины үйлдвэрлэл болон илэрсэн лабораториудын талаар юу ч мэдэхгүй хэмээн мэдүүлсэн байна. Тэрбээр "Хенри" гэх Нигери танил нь ресторан нээх хамтарсан бизнес эрхлэхээр урьсны дагуу ирсэн гэж өөрийгөө өмгөөлжээ.
Гэвч хэрэгт цугларсан шүүх шинжилгээний дүгнэлт, цахим нотлох баримтууд болон өмнө нь баривчлагдсан гэмт хамсаатнуудынх нь өгсөн мэдүүлэг түүний тайлбарыг няцааж байгааг хууль сахиулах байгууллагаас мэдэгдлээ.
Энэхүү ажиллагаа нь олон улсын хар тамхины бүлэглэлүүд Африк тивийн бүс нутгийг химийн аргаар гарган авдаг мансууруулах бодис үйлдвэрлэх бааз болгон ашиглах гэсэн оролдлогыг таслан зогсооход чухал алхам боллоо. Нигерийн хууль сахиулагчид олон улсын түншүүдтэй хамтран хил дамжсан зохион байгуулалттай гэмт хэргийн сүлжээг үндсээр нь устгах хяналт шалгалтыг цаашид эрчимтэй үргэлжлүүлнэ гэжээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.