Монгол, Орос, Хятад гурван улсын аялал жуулчлалын сайд нарын уулзалт хөх хотноо амжилттай боллоо

БНХАУ-ын Хөх хотноо зохион байгуулагдсан гурван улсын Аялал жуулчлалын сайд нарын X уулзалтад Монгол Улсаа төлөөлөн Соёл, спорт, аялал жуулчлал, залуучуудын сайд Ж.Алдаржавхлан оролцлоо.

Тэрээр эртний түүхт “Цайны зам”-ыг аялал жуулчлалын шинэ брэнд болгон хөгжүүлж, хамтарсан маркетинг хийснээр гадаадын илүү олон жуулчин татах боломжтойг онцлон тэмдэглэв.

Аялал жуулчлалын онцлох тоон мэдээлэл: Манай улсад ирдэг жуулчдын зах зээлийг БНХАУ болон ОХУ тэргүүлж байна. 2025 онд Монгол Улсад нийт 847,000 гаруй гадаадын жуулчин ирснээс БНХАУ-аас 242,000, ОХУ-аас 230,000 жуулчин тус тус зочилжээ.

Уулзалтын үр дүн, хэрэгжиж буй онцлох ажлууд:

Авто ралли: Энэ сард буюу 2026 оны 06 дугаар сарын 20-30-нд 3 улсыг дамнасан "Цайны зам" нөхөрсөг авто ралли амжилттай зохион байгуулагдлаа.

Шууд нислэг: Бээжин-Мөрөн-Бээжин чиглэлийн шууд нислэгийг энэ оны 7, 8 дугаар сард үйлдэхээр бэлтгэл хангаж байна.

Өвлийн аялал жуулчлал: ОХУ-ын баг тамирчидтай хамтарсан хоккейн нөхөрсөг тэмцээн зэргээр өвлийн аяллыг идэвхжүүлж байна.

Шинэ гишүүд: "Цайны зам" олон улсын аялал жуулчлалын холбоонд Дархан-Уул болон Төв аймгууд албан ёсоор элслээ.

Бүс нутгийн аялал жуулчлалыг эрчимжүүлэх ач холбогдолтой уг уулзалт амжилттай өндөрлөж, дараагийн XI уулзалтыг 2027 онд ОХУ-ын Москва хотод зохион байгуулахаар тогтов.