🔴МАН-ын бүлэг уул уурхай, тэтгэвэр, орон сууцны бодлогын асуудлыг хэлэлцлээ

УИХ дахь МАН-ын бүлэг ээлжит хуралдаанаараа Ашигт малтмалын тухай хуулийн шинэчилсэн найруулга, тэтгэврийн шинэчлэл, орон сууцны бодлого болон нийслэлийн бүтээн байгуулалтын асуудлыг хэлэлцжээ.

Аж үйлдвэр, эрдэс баялгийн сайд Д.Дамдинням зэсийн АМНАТ-ийг бууруулах асуудлыг энэ удаагийн хуулийн төсөлд тусгаагүй болохыг мэдэгдэв. Тэрбээр Оюутолгойн хэлэлцээртэй холбоотой эрсдэлийг харгалзан үзэж, эхний ээлжид Ашигт малтмалын тухай хуулийн бусад өөрчлөлтийг батлуулах нь зүйтэй гэж үзсэнээ онцоллоо.

14 жил хүлээгдсэн хуулийн шинэчлэлээр хайгуулын тусгай зөвшөөрлийн тогтолцоог шинэчлэх, хөрөнгө оруулалтын орчныг сайжруулах, баяжуулалтын үйл ажиллагааг зохицуулах, орон нутгийн өгөөжийг нэмэгдүүлэх, нөхөн сэргээлтийн баталгааг сайжруулах зэрэг томоохон өөрчлөлтүүдийг тусгажээ.

Мөн уул уурхайн салбарыг төрөлжүүлж, шинэ төслүүдийг хөдөлгөх зорилт дэвшүүлсэн байна. Бүлгийн хурлаар Тусгай хамгаалалттай газар нутгийн тухай хуулийн шинэчилсэн найруулгын төслийг хэлэлцэж, гишүүдийн саналыг тусган сайжруулсны дараа өргөн барихаар болжээ.

Мөн орон сууцжуулалтын бодлогын хүрээнд зөвхөн эрэлтийг бус нийлүүлэлтийг дэмжих, орон сууцны санхүүжилтийн төрөлжсөн банк байгуулах, үнийн өсөлтийг хязгаарлах асуудлыг хэлэлцсэн байна. Тэтгэврийн шинэчлэлийн тухайд үе шаттай хэрэгжүүлэхээр төлөвлөж байгаа бөгөөд холбогдох саналуудыг дахин боловсруулсны дараа УИХ-д өргөн мэдүүлэхээр болжээ. Шинэчлэл нь олон жил шимтгэл төлсөн иргэдийг дэмжих, шударга тогтолцоог бүрдүүлэхэд чиглэх аж.

Түүнчлэн хаврын чуулганаар татварын дөрвөн хуульд өөрчлөлт оруулахаар ажиллаж байгаа бөгөөд батлагдвал 2.2 их наяд төгрөгийн татварын ачаалал буурч, иргэд болон аж ахуйн нэгжүүдэд үлдэх тооцоолол гарчээ. Нийслэлийн зарим томоохон төслийн хувьд сонгон шалгаруулалтын үйл ажиллагаатай холбоотой асуудлыг хууль хяналтын байгууллага шалгаж байгаа бөгөөд шалгалтын дүн гарсны дараа төслүүдийг үргэлжлүүлэх боломжтой гэж бүлгийн төлөөлөл мэдээллээ. Мөн Газрын тос боловсруулах үйлдвэр болон Эрдэнэбүрэнгийн усан цахилгаан станцын төслийг эрчимжүүлэх чиглэлээр ажиллаж байгааг онцолсон байна.