"Монгол дохионы хэлний тухай" хуулийн төслийг боловсруулж байна

Эрүүл мэнд 2026/06/05 16:01 А. Сүнчигмаа

Монгол Улсын Сонсголгүй Иргэдийн Үндэсний Холбооноос Засгийн газар болон Гэр бүл хөдөлмөр нийгмийн хамгааллын яаманд хандан шаардлага хүргүүлсэн. Шаардлагын хүрээнд Гэр бүл хөдөлмөр, нийгмийн хамгааллын яамны төлөөлөл, холбогдох албан хаагчид Монгол Улсын Сонсголгүй Иргэдийн Үндэсний Холбооны ерөнхийлөгч А.Энхбаатар болон сонсголын бэрхшээлтэй иргэдийн төлөөллийг хүлээн авч уулзжээ.

Гэр бүл, хөдөлмөр, нийгмийн хамгааллын яам уг шаардлагыг хүлээн авч, хүний эрхийг дээдлэх, тэгш оролцоог хангах зарчмын хүрээнд бодитой шийдвэрүүдийг гарган, шат дараатай арга хэмжээнүүдийг хэрэгжүүлж эхэлснийг албан ёсоор мэдэгдлээ. Мөн тухайн шаардлагад ирүүлсэн яам дангаар шийдэх боломжгүй асуудлуудыг бусад яамд, төрийн байгууллагуудтай хамтран шийдвэрлэх үйл явцыг ханган ажиллахаа энэ үеэр мэдэгдсэн байна.

Сонсголын бэрхшээлтэй иргэдийн шаардлагын дагуу хууль эрх зүй, хүртээмжийн чиглэлээр тодорхой арга хэмжээ авч Гэр бүл, хөдөлмөр, нийгмийн хамгааллын яамнаас "Монгол дохионы хэлний тухай" хуулийн төслийг боловсруулж байгаа бөгөөд хуулийн үзэл баримтлалыг Хууль зүй, дотоод хэргийн яаманд хүргүүлжээ.

Уг хууль нь Монгол дохионы хэлийг эзэмших, хэрэглэх, хамгаалах, хөгжүүлэх эрх зүйн үндсийг бүрдүүлж, сонсголын бэрхшээлтэй иргэдийн нийгмийн оролцоог нэмэгдүүлэх зорилготой аж. Мөн төрийн үйлчилгээг сонсголын бэрхшээлтэй иргэдэд саадгүй хүргэх зорилгоор дохионы хэлмэрчийн зардлыг 2027 оны улсын төсөвт тусгах чиглэлийг энэ оны тавдугаар сарын 27-нд бүх яам, аймаг, нийслэлийн Засаг дарга нарт хүргүүлсэн байна. Мэдээллийн хүртээмжийг сайжруулах чиглэлээр Харилцаа холбооны зохицуулах хороо телевизийн нэвтрүүлгийг дохионы хэлний хэлмэрч болон хадмал тайлбартайгаар хүргэх стандартыг батлуулах, IPTV системд олон улсын зөвлөмжид нийцсэн технологийн шийдэл нэвтрүүлэх ажлыг эхлүүлжээ.

Түүнчлэн Сонсголгүй Иргэдийн Үндэсний Холбооны одоогийн ашиглаж буй байранд үйл ажиллагаагаа хэвийн явуулахад нь дэмжлэг үзүүлсэн бөгөөд санхүүжилтийн тогтолцоог боловсронгуй болгох асуудлыг "Хөгжлийн бэрхшээлтэй хүний эрхийн тухай хууль"-ийн шинэчилсэн найруулга болон "Монгол дохионы хэлний тухай" хуулийн төсөлд тусгахаар ажиллаж байгаа талаар мэдээлэв.

Сонсголгүй жолоочийн эрхийн зохицуулалттай холбоотой асуудлыг салбарын холбогдох байгууллагуудад уламжилж, шуурхай шийдвэрлүүлэхээр ажиллаж байгаа аж.

Гэр бүл, хөдөлмөр, нийгмийн хамгааллын сайд болон Төрийн нарийн бичгийн дарга нар иргэн бүрт тэгш, хүртээмжтэй төрийн үйлчилгээг хүргэх нь төрийн байгууллагын үүрэг болохыг онцолж, сонсголын бэрхшээлтэй иргэдээс ирүүлсэн шаардлагыг бодит ажил хэрэг болгон хэрэгжүүлэх чиглэлээр холбогдох албан тушаалтнуудад үүрэг даалгавар өгсөн байна.