Францын музейгээс алдарт гадил жимсний бүтээлийг алдагджээ
Францын зүүн хэсэгт байрлах "Centre Pompidou-Metz" музейгээс 2026 оны тавдугаар сарын 30-ны бямба гаргийн 14:00 цагийн орчимд Италийн уран бүтээлч Маурицио Каттеланы "Инээдмийн жүжигчин" хэмээх алдарт гадил жимсний бүтээлийг үл таних этгээд хулгайлжээ.
Хананд наалддаг туузаар тогтоосон жинхэнэ гадил жимснээс бүрдэх уг концептуал урлагийн бүтээл алга болсныг музейн хамгаалалтын ажилтан хамгийн түрүүнд анзаарчээ.
Уг бүтээл нь "Төгсгөлгүй ням гараг: Маурицио Каттелан ба Помпиду төвийн цуглуулга" нэртэй үзэсгэлэнгийн гол үзмэр байсан юм. Музейн удирдлагуудын зүгээс хулгайчийн эсрэг хууль хяналтын байгууллагад албан ёсоор гомдол гаргаснаа мэдэгдэв. Түүнчлэн энэ үйлдэл нь дэлгэгдсэн уран бүтээлийг үл хүндэтгэсэн, үзэсгэлэнг зорин ирсэн хүмүүсийн мэдрэмж, туршлагаас хугасласан бүдүүлэг хэрэг хэмээн хатуу буруушаалаа.
Гэхдээ гадил жимсийг хулгайлсан явдал нь музейд санхүүгийн томоохон хохирол учруулаагүй байна. Учир нь муудаж өнгөө алддаг тул үзмэрийн гадилыг гурав хоног тутамд шинээр сольдог журамтай бөгөөд зохион байгуулагчид алдагдсан жимсийг даруй шинээр орлуулж, бүтээлийг анхны байдалд нь оруулжээ. Албаны хүмүүсийн тайлбарласнаар, хэдэн сая ам.доллароор хэмжигдэх уг бүтээлийн жинхэнэ үнэ цэнэ нь мууддаг жимсэндээ бус, харин түүнийг дагалдах албан ёсны гэрчилгээ болон дэлгэн үзүүлэх нарийн протоколд оршдог байна.
Маурицио Каттеланы өвөрмөц бүтээл 2019 онд "Art Basel Miami Beach" үзэсгэлэнд анх танилцуулагдсан цагаасаа хойш хэд хэдэн удаа хачирхалтай халдлагад өртөж байв.
Тухайлбал, 2019 онд Майамид уран бүтээлч Дэвид Датуна анхны гадилыг хананаас хуулж идсэн бол 2023 онд Сөүлийн "Leeum" урлагийн музейд Өмнөд Солонгосын нэгэн оюутан өглөөний цайгаа уугаагүй өлссөн гэх шалтгаанаар үзмэрийг мөн л идэж орхисон түүхтэй. Хамгийн сүүлд 2024 оны арваннэгдүгээр сард "Sotheby's"-ийн дуудлага худалдаагаар уг бүтээлийн нэг хувилбарыг криптовалютын бизнес эрхлэгч Жастин Сан 6.2 сая ам.доллароор худалдаж авсныхаа дараа тайзан дээр шууд идсэн байдаг.
Сонирхолтой нь, яг энэ "Centre Pompidou-Metz" музейн үзэсгэлэнгийн үеэр 2025 оны долоодугаар сард нэгэн өлссөн үзэгч гадил жимсийг идэж байсан бөгөөд тэр үед музейн зүгээс цагдаагийн байгууллагад хандахгүй өнгөрч байжээ. Харин энэ удаагийн хулгайн хэрэгт хуулийн байгууллагыг татан оролцуулсан нь концептуал урлагийн бүтээлийн аюулгүй байдал, зохиогчийн эрхийг хамгаалах асуудалд музейнүүд илүү нухацтай хандаж эхэлснийг харуулж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.