Монгол Улсад трактор угсрах үйлдвэр байгуулна
Монгол Улсын Их Хурлын гишүүн, Хүнс, хөдөө аж ахуй, хөнгөн үйлдвэрийн сайд Ц.Идэрбат Монгол, Беларусийн Засгийн газар хоорондын комиссын VIII хуралдааны хүрээнд Бүгд Найрамдах Беларусь Улсад албан айлчлал хийж байна.
Айлчлалын үеэр хоёр улсын хөдөө аж ахуй, хүнс, хөнгөн үйлдвэрийн салбарын хамтын ажиллагааг өргөжүүлэх, худалдаа, хөрөнгө оруулалтыг нэмэгдүүлэх, техник технологийн шинэчлэлийг эрчимжүүлэх асуудлаар Беларусь улсын төрийн болон хувийн хэвшлийн байгууллагуудтай уулзалт, хэлэлцээ өрнүүлжээ.
Төлөөлөгчид Беларусийн тэргүүлэх үйлдвэрлэгчдийн нэг болох Минскийн тракторын үйлдвэр болон Минскийн автомашины үйлдвэрийн үйл ажиллагаатай танилцаж, үйлдвэрлэлийн туршлага, дэвшилтэт технологийн шийдлүүдийг судалсан байна.
Айлчлалын хүрээнд Монгол Улсад трактор нийлүүлэх, цаашлаад трактор угсрах үйлдвэр байгуулах асуудлыг хэлэлцэн эхлүүлэхээр тохиролцжээ. Энэ хүрээнд Минскийн тракторын үйлдвэр болон ХХААХҮЯ-ны харьяа “Хөдөө аж ахуйн корпораци” ТӨХХК хамтын ажиллагааны санамж бичиг байгуулахаар болсон байна.
Беларусийн Минскийн тракторын үйлдвэр нь 80 жилийн түүхтэй бөгөөд өнөөдрийн байдлаар дөрвөн сая гаруй трактор үйлдвэрлэж, бүтээгдэхүүнээ дэлхийн 125 оронд экспортолж байгаа юм. Харин Минскийн автомашины үйлдвэр нь Зүүн Европын томоохон үйлдвэрлэгчдийн нэг бөгөөд жилд 15 мянга гаруй техник үйлдвэрлэдэг аж.
Монгол, Беларусь хоёр улс 1992 онд дипломат харилцаа тогтоосноос хойш худалдаа, эдийн засаг, хөдөө аж ахуй, боловсрол зэрэг олон салбарт хамтын ажиллагаагаа тогтвортой хөгжүүлж иржээ. Түүнчлэн “Экспортын зээлийн ерөнхий хэлэлцээр”-ийн хүрээнд Монгол Улсад онцгой байдал, нийтийн үйлчилгээ, хөдөө аж ахуйн салбарын техник, тоног төхөөрөмжийн шинэчлэлийг хэрэгжүүлж, нийт 117 трактор болон 417 нэгж техник нийлүүлсэн байна. Талууд энэхүү айлчлалыг Монгол, Беларусийн уламжлалт найрсаг харилцааг бэхжүүлэхийн зэрэгцээ хөдөө аж ахуй, хүнсний үйлдвэрлэлийн салбарын харилцан ашигтай хамтын ажиллагааг шинэ шатанд гаргах чухал алхам гэж үзэж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.