3х3 сагсан бөмбөгийн үндэсний шигшээ багууд Дэлхийн аварга шалгаруулах тэмцээнийг зорилоо
3х3 сагсан бөмбөгийн эрэгтэй, эмэгтэй үндэсний шигшээ багууд 2026 оны зургаадугаар сарын 1-нээс 7-ны өдрүүдэд Польш улсын Варшав хотноо зохион байгуулагдах 10 дахь удаагийн насанд хүрэгчдийн Дэлхийн аварга шалгаруулах тэмцээнд оролцохоор тавдугаар сарын 27-ны өдөр хилийн дээс алхлаа.
"Parade Square" буюу "Plac Defilad" талбайд явагдах тус тэмцээнд хүйсийн ангилал тус бүрд дэлхийн шилдэг 20 баг өрсөлдөж, аваргын цомын төлөө хүч үзэх юм.
Энэ удаагийн дэлхийн аваргад оролцох бүрэлдэхүүнд нэлээдгүй өөрчлөлт орсон байна. Эрэгтэй багийн хувьд үндсэн бүрэлдэхүүний 75 хувийг шинэчилж, А.Ананд, Э.Сугар-Очир, Г.Дөлгөөн, Г.Болор-Эрдэнэ гэсэн тамирчдын бүрэлдэхүүнтэйгээр талбайд гарах юм. Харин эмэгтэй багийн бүрэлдэхүүнд Б.Ариунцэцэг, О.Хулан, Э.Нарангоо, Б.Болор-Эрдэнэ нар багтсан бөгөөд өмнөх тэмцээнд оролцсон Н.Нандинхүсэлийн оронд Э.Нарангоо дуудагджээ. Олон улсын тоймчид багийн ахлагч О.Хуланг дэлхийн хэмжээний од бөгөөд 3х3 сагсан бөмбөгийн гол бэлгэ тэмдэг хэмээн онцгойлон сайшааж байна.
Үндэсний шигшээ багууд хоёулаа чансааны аравдугаар байрт эрэмбэлэгдэж байгаа бөгөөд сугалааны дагуу "В" хэсэгт хуваарилагдсан байна. Эрэгтэй баг АНУ, Латви, Чех, Польшийн хүчирхэг багуудтай тоглох бол эмэгтэйчүүд Австрали, Испани, АНУ, Унгар гэсэн ширүүн өрсөлдөгчидтэй нэг хэсэгт багтжээ. Цагийн бүсийн зургаан цагийн зөрүүтэйгээс шалтгаалан тоглолтууд шөнийн цагаар явагдах бөгөөд эрэгтэйчүүдийн эхний тоглолт зургаадугаар сарын 2-ны 23:55 цагт Чехийн эсрэг эхлэх хуваарьтай байна. Үүний дараа Польш, АНУ, Латвийн эсрэг тус тус тоглоно.
Спорт сонирхогчид 2026 оны 3х3-ын Дэлхийн аварга шалгаруулах тэмцээний бүх тоглолтыг "Premier Sports Network" телевизийн сувгаар орон даяар шууд хүлээн авч үзэх боломжтой. Эмэгтэй баг 2025 оны дэлхийн аваргаас мөнгөн медаль хүртэж түүхэн амжилт тогтоож байсан бол эрэгтэй багийн хувьд 2018 онд наймдугаар байрт шалгарсан нь одоогоор хамгийн өндөр үзүүлэлт болоод байна. Энэ удаагийн дэлхийн дэвжээнд манай тамирчид өмнөх амжилтаа ахиулж, шинэ түүх бүтээх өндөр зорилготойгоор ийнхүү тэмцээнийг зорилоо.
Эх сурвалж:
• eagle.mn
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.