Жүжигчин Мэттью Перригийн үхэлд туслахыг нь буруутгаж ял оноов
"Friends" цувралын од, нэрт жүжигчин Мэттью Перригийн хувийн туслахаар ажиллаж байсан Кеннет Ивамасад холбооны шүүхээс 2026 оны 5 дугаар сарын 27-ны лхагва гарагт 3 жил 5 сар буюу 41 сар хоригдох ял оноожээ.
Түүнийг нэрт жүжигчний үхэлд буруутай хэмээн шүүх үзсэн байна.
Лос-Анжелес хотод болсон шүүх хурлын үеэр АНУ-ын Дүүргийн шүүгч прокуроруудын шаардсантай яг ижил хэмжээний буюу 41 сар хорих, хоёр жил тэнсэн харгалзах, 10,000 ам.долларын торгууль төлөх ялыг оноожээ.
Өдгөө 60 настай Ивамаса нь 2024 оны наймдугаар сард кетамин тариа тарьсан хэргээ хүлээн зөвшөөрсөн юм. Шүүгч түүний үйлдлийг "зөвхөн нас барсан өдөр нь бус, түүний өмнөх өдрүүдэд ч маш хариуцлагагүй байсан" гэж буруутгасан хэдий ч "хорлон сүйтгэх санаатай байсан гэх хатуу нотлох баримт байхгүй"-г онцолсон байна.
Ивамаса нь эмнэлгийн ямар ч мэдлэггүй хэдий ч жүжигчин Перрид удаа дараа кетамин тарьж байсан бөгөөд 2023 оны аравдугаар сарын 28-нд үхэлд хүргэх тунг тарьж, улмаар түүнийг усан санд нас барсан байхыг нь анх олж байжээ.
Жилийн 150,000 ам.долларын цалинтайгаар 2022 оноос хойш туслахаар нь ажилласан тэрээр жүжигчний амьдралын сүүлийн өдрүүдэд өдөрт 6-8 удаа кетамин тариа тарьдаг байжээ.
Шүүх хурлын үеэр Ивамаса жүжигчний гэр бүлийнхнээс уучлалт гуйж, хийсэн хууль бус үйлдэлдээ насан туршдаа харамсаж явах болно гэдгээ илэрхийлсэн юм. Харин Перригийн ээж Сюзанна Моррисон шүүгчид илгээсэн захидалдаа түүнийг "мөс чанаргүй хүн" хэмээн хатуу шүүмжилжээ.
Энэхүү шүүхийн шийдвэр нь үхэлд хүргэх эмийг нийлүүлсэн гэмт хэргийн сүлжээг илрүүлэх зорилготой 2.5 жил үргэлжилсэн мөрдөн байцаалтын тав дахь буюу эцсийн ял шийтгэл болж байна. Уг хэрэгт холбогдсон бусад дөрвөн хүн мөн ял сонссон бөгөөд үхэлд хүргэсэн эмийг нийлүүлсэн "Кетамины хатан хаан" гэгддэг Жасвин Сангха 15 жил, эмийг анх нийлүүлж, хэрхэн тарихыг зааж өгсөн эмч Сальвадор Пласенсиа 30 сар хоригдох ялаар тус тус шийтгүүлжээ.
Ийнхүү алдартай жүжигчний эмгэнэлт үхлийн эргэн тойрон дахь хууль эрх зүйн томоохон маргаан эцэслэн шийдвэрлэгдлээ.
Эх сурвалж:
• wral.com
• pbs.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.