ОХУ-д өсвөр насныхны гэмт хэрэг эрс нэмэгдэж байна
ОХУ-ын Дотоод хэргийн яам болон Боловсролын яамны хамгийн сүүлийн үеийн тайлангаар тус улсад өсвөр насныхны гэмт хэрэг сүүлийн арван жилд анх удаа огцом өссөн үзүүлэлттэй гарчээ.
Насанд хүрээгүйчүүдийн хэрэг эрхлэх комиссын албан ёсны бүртгэлд 453,600 өсвөр насны хүүхэд бүртгэгдсэн нь өмнөх оныхоос 33,600-гаар нэмэгдсэн дүн юм.
Ерөнхий прокурор Александр Гуцаны мэдээлснээр насанд хүрээгүйчүүдийн үйлдсэн нийт гэмт хэрэг 10 хувиар өсжээ.
Хамгийн ноцтой нь хар тамхины худалдаа, экстремизм, цэрэг болон төмөр замын дэд бүтцийг галдан шатаах зэрэг хүнд болон онц хүнд гэмт хэргийн гаралт бараг 50 хувиар буюу 48.9 хувиар нэмэгдсэн байна. Түүнчлэн цагдаа болон сургуулийн хяналтад байгаа хүүхдүүдийн арав тутмын нэг нь дахин гэмт хэрэг үйлдэж байгаа нь хяналтын тогтолцоо хангалтгүй байгааг харуулж байна.
Гэмт хэрэг давтан үйлдэгдэх болсон шалтгааныг судлаачид хэд хэдэн хүчин зүйлтэй холбон тайлбарлаж байна.
Хүүхдийг албан ёсны бүртгэлд оруулах нь нийгмээс тусгаарлагдах мэдрэмж төрүүлж, улмаар гэмт бүлэглэлд нэгдэхэд хүргэдэг аж. Мөн зохион байгуулалттай гэмт бүлэглэлүүд болон гадаадын тагнуулын байгууллагууд цахим мессежийн аппликейшн ашиглан бага эрсдэлтэй, өндөр өгөөжтэй хэрэгт хүүхдүүдийг элсүүлэх нь ихэсжээ. Үүнээс гадна нийгэм дэх хүчирхийллийн хэвийн үзэгдэл болон Украин дахь мөргөлдөөн зэрэг нь залуучуудын ёс суртахууны хандлагад сөргөөр нөлөөлж байна гэж социологчид үзэж байна.
Уг нөхцөл байдалтай тэмцэхийн тулд Оросын засгийн газар хэд хэдэн шинэ санаачилга гаргажээ.
Ерөнхий сайд Михаил Мишустин сөрөг үзэгдлийн эсрэг 41 арга хэмжээ бүхий "2026-2030 оны Залуучуудын төлөвлөгөө"-г баталсан байна. Сургууль, их дээд сургуулиуд оюутнуудын цахим үйл ажиллагааг хянах "кибер эргүүл"-ийг өргөжүүлж, сэжигтэй мэдээллийг Дотоод хэргийн яаманд шууд дамжуулах болжээ. Мөн хорлон сүйтгэх, терроризм зэрэг гэмт хэрэгт эрүүгийн хариуцлага хүлээх насыг 14 болгон бууруулж, хүүхдүүдийг ийм үйлдэлд уруу татсан этгээдэд бүх насаар нь хорих ял оноох хуулийн өөрчлөлт оруулсан байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.