В12 аминдэмийн дутагдлаас болж сэтгэцэд нь өөрчлөлт орсон оюутан амиа хорложээ
Их Британийн Суонсигийн их сургуулийн 21 настай оюутан Жоржина Оуэн цагаан хоолны дэглэмээс үүдэлтэй В12 аминдэмийн ноцтой дутагдалд орж, улмаар сэтгэцийн өөрчлөлтөд орсноор амиа хорлосон болохыг шүүх эмнэлгээс албан ёсоор тогтоолоо.
Кембриджшир мужийн шүүх эмнэлгийн шинжээч уг эмгэнэлт хэрэг нь хоолны дэглэмээс шууд хамааралтай болохыг баталсан бөгөөд талийгаачийн эцэг эх олон нийтэд хандан мэдээлэл хийснээр энэхүү асуудал олон улсын эрүүл мэндийн салбарт хүчтэй мэтгэлцээн өрнүүлж эхлээд байна.
Талийгаач байгаль орчныг хамгаалах зорилгоор 2016 оноос хойш гурван жилийн турш хатуу цагаан хоолны дэглэм барьсан байна. Шүүх эмнэлгийн сонсголын үеэр танилцуулсан нотлох баримтаас үзэхэд тэрээр амиа алдахаасаа өмнөх зургаан сарын хугацаанд В12 аминдэмийн нэмэлт тэжээл уухаа зогсоожээ. Хэдийгээр Жоржина гэр бүлийнхэндээ Канадад үйлдвэрлэсэн органик цацлага хэрэглэж байгаа гэж хэлж байсан ч эмнэлгийн мэргэжилтнүүд уг бүтээгдэхүүний тун хангалтгүй, эсвэл тогтмол хэрэглээгүй байх өндөр магадлалтайг онцолсон байна.
Аминдэмийн дутагдал нь түүний мэдрэлийн системд нөхөж баршгүй хохирол учруулсан бөгөөд амиа алдахаас өмнөх саруудад зан ааш нь огцом өөрчлөгдөж, танин мэдэхүйн чадвар нь муудан, энгийн шийдвэр гаргахад ч хүндрэлтэй болж эхэлжээ. Шүүхийн шинжилгээнд ашигласан түүний өдрийн тэмдэглэлд хий юм харах, хийрхэх, сэтгэцийн гүн хямралд орсон байдал нь тодорхой бичигдсэн байв.
Сэтгэцийн эмч, хоол зүйчдийн тайлбарласнаар В12 аминдэмийн ноцтой дутагдал нь хүнийг хий юм харах, бодит байдлаас төөрөгдөх зэрэг сэтгэцийн ноцтой эмгэгт хүргэдэг бөгөөд энэ нь түүнийг амиа хорлох үйлдэл хийхэд шууд нөлөөлсөн гэж дүгнэжээ.
Охиноо гэнэт амиа алдсаны жинхэнэ шалтгааныг олохын тулд олон жилийн турш тэмцсэн эцэг эх нь өнөөдөр олон нийтэд хандан үнэнийг дэлгэж байна.
Тэд охиныхоо өдрийн тэмдэглэл болон цусны шинжилгээний хариуг дэлгэж, энэ нь жирийн нэг сэтгэл гутрал бус, харин хоолны дэглэмээс үүдэлтэй биологийн өөрчлөлт байсныг баталжээ.
Энэхүү хэрэг нь ургамлын гаралтай хоолны дэглэм баримталдаг хүмүүст эрүүл мэндийн ноцтой сэрэмжлүүлэг болж байна.
Мэргэжилтнүүд веган дэглэм баримтлагчдыг баталгаагүй органик бүтээгдэхүүнээс татгалзаж, Их Британийн Үндэсний эрүүл мэндийн албанаас санал болгодог өдөрт 1.5 микрограмм тун бүхий найдвартай, анагаах ухаанаар баталгаажсан нэмэлт тэжээлийг заавал хэрэглэхийг хатуу анхааруулж байна. В12 аминдэм нь мэдрэлийн системийн хэвийн үйл ажиллагаанд амин чухал үүрэгтэй бөгөөд түүний дутагдал нь хүний амь насанд хүрэх эрсдэлтэйг энэхүү эмгэнэлт явдал бэлхнээ харууллаа.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.