Өдөрт таван минут дасгал хийх нь нас барах эрсдэлийг бууруулна

Норвегийн Спортын шинжлэх ухааны сургуулийн профессорын ахлуулсан эрдэмтдийн баг өдөрт ердөө таван минут эрчимтэй дасгал хөдөлгөөн хийх нь цаг бусаар нас барах эрсдэлийг арван хувиар бууруулдаг болохыг тогтоожээ.

Уг өргөн цар хүрээтэй судалгаанд Их Британи, АНУ, Норвеги, Швед зэрэг дөрвөн улсын 135,000-аас 150,000 орчим насанд хүрэгчдийн мэдээллийг хамруулжээ. Судлаачид оролцогчдын мэдээллийг аман асуумжаар бус, харин хөдөлгөөн хэмжигч тусгай төхөөрөмжийн тусламжтайгаар цуглуулсан нь үр дүнг илүү бодитой, нарийвчлалтай болгосон байна. Судалгааны гол үр дүнгээр хурдан алхах, шатаар өгсөх, эсвэл гэрээ эрчимтэй цэвэрлэх зэрэг өдөр тутмын энгийн хөдөлгөөнүүд нь хүний эрүүл мэндэд онцгой ач холбогдолтой болох нь батлагджээ.

Хөдөлгөөний дутагдалтай хүмүүст багахан хугацааны дасгал хүртэл мэдэгдэхүйц нөлөө үзүүлдэг байна.

Нийт хүн амын хамгийн бага хөдөлгөөнтэй 20 хувийн хувьд өдөрт тавхан минут идэвхтэй хөдөлгөөн нэмэхэд нас барах эрсдэл зургаан хувиар буурчээ. Түүнчлэн өдрийн турш суух хугацааг 30 минутаар багасгах нь аливаа шалтгаант нас баралтын эрсдэлийг долоон хувиар бууруулдаг болохыг эрдэмтэд онцолсон байна. 

Хэрэв дэлхийн бүх хүн өдөр тутмын хөдөлгөөнөө таван минутаар нэмэгдүүлж чадвал жил бүр сая сая хүнийг цаг бусаар эндэхээс аврах боломжтой гэж судлаачид тооцоолжээ.

Оксфордын их сургуулийн профессор Айден Дохерти зэрэг нийгмийн эрүүл мэндийн мэргэжилтнүүд шинэхэн судалгааг шинжлэх ухааны "том үсрэлт" хэмээн үнэлж байна. Учир нь долоо хоногт 150 минут дасгал хийх зэрэг биелүүлэхэд хэцүү зорилтоос илүүтэйгээр, өдөр тутмын амьдралд хэрэгжүүлэх боломжтой жижиг өөрчлөлтүүд нь нийгмийн эрүүл мэндэд илүү өргөн хүрээний ашиг тус авчирдаг болохыг харууллаа.

Үүнтэй зэрэгцэн "Nature" сэтгүүлд нийтлэгдсэн өөр нэгэн судалгаагаар өдөрт 6.4-өөс 7.8 цаг унтах нь урт наслахад хамгийн тохиромжтой бөгөөд үүнээс хэтрүүлэх, эсвэл дутаах нь биологийн хөгшрөлтийг хурдасгадаг болохыг тогтоосон байна.

Дээрх шинжлэх ухааны ололт амжилтууд нь олон нийтийн эрүүл мэндийн бодлогод аль хэдийн нөлөөлж эхэлжээ. Тухайлбал, эрүүл мэндийн байгууллагууд "Сургууль руугаа аюулгүй алхах үндэсний өдөр"-ийг тохиолдуулан эцэг эхчүүдийг сургуулиас хэдэн гудамжны цаана машинаа байрлуулж, хүүхдүүдтэйгээ хамт алхахыг уриалж байна. Энэ мэтчилэн өдөр тутмын амьдралын хэв маягтаа оруулах тавхан минутын энгийн өөрчлөлт нь хүн төрөлхтний эрүүл, урт удаан амьдрах үндэс суурь болох төлөвтэй байна.

Эх сурвалж:

• sciencedaily.com