🔴Ч.Лодойсамбуу: Сэтгүүлчийг ялтан болгох гэсэн хуулийн заалтыг байгааг дэмжихгүй

УИХ-ын гишүүн Ч.Лодойсамбуу Эрүүгийн хуульд "гүтгэх" заалтыг нэмж оруулахыг эсэргүүцэж байгаагаа илэрхийллээ.

Тэрээр уг хуулийн төслийг боловсруулах ажлын хэсгийн сүүлийн хоёр хуралд энэхүү байр суурийнхаа улмаас оролцоогүй бөгөөд хүний нэр төр, алдар хүндийг гутаасан асуудлыг Эрүүгийн бус Иргэний шүүхээр шийдвэрлэх ёстой гэж үзэж байна.

УИХ-ын гишүүн Ч.Лодойсамбуу:

-Үндсэн хуулийн цэцээс хүний нэр төр, алдар хүндийг хамгаалах зохицуулалт хийх үүрэг даалгавар өгсний дагуу Эрүүгийн хуульд өөрчлөлт оруулах ажлын хэсэг байгуулагдсан. Эрүүгийн гэмт хэрэгт тооцож, ялтан болгох логикийг буруутгаж байна. Төр хоёр хүний хоорондын маргаанд хөндлөнгөөс орж гүтгэсэн этгээдийг торгож шийтгэдэг ч, хохирогч тал хохирлоо барагдуулж чадалгүй үлддэг тогтолцоо үйлчилж байна. Энэ нь иргэнийг хамгаалах бус, зөвхөн шийтгэхийг урьтал болгосон хандлага. 

Үүний оронд иргэний шүүхийн үйл ажиллагааг сайжруулж, хохирогч хохирлоо нөхөн төлүүлдэг байх нь зүйтэй. Өмнө нь Х.Тэмүүжин Хууль зүйн сайд байхдаа "Тахарын алба"-ыг байгуулж, иргэний шүүх дээр хариуцагчийг олж авчран процессыг хурдасгадаг байсан сайн жишгийг сэргээх шаардлагатай. Ингэснээр хэн нэгнийг эрүүгийн ялтан болгож, гадаадад зорчих эрхийг нь хязгаарлах зэргээр насан туршид нь хар тамга дарахгүйгээр, гүтгэсэн этгээд нь учруулсан хохирлоо мөнгөөр барагдуулдаг эрх зүйн орчин бүрдэнэ. 

Сэтгүүлчдийн хувьд ч энэ хууль нь айлган сүрдүүлэх хэрэгсэл болж хувирах эрсдэлтэй. Хүнийг гүтгэх эрх чөлөө хаана ч байхгүй. Сэтгүүлчид мэдээллийг нягтлан шалгаж, батлагдаагүй мэдээллийг магадлалтай байдлаар хүргэх зэргээр мэргэжлийн ёс зүйгээ баримтлах ёстой. 1998 онд батлагдсан Хэвлэлийн эрх чөлөөний тухай хууль нь сэтгүүлчдэд хангалттай эрх чөлөө олгодог. Шинээр хуульчилж, сэтгүүлчдийг хамгаалах нэрийн дор хайрцаглаж, хязгаарлах гэсэн аливаа оролдлогыг эсэргүүцэж байна.

Хууль гэдэг нь хүнийг хэт шийтгэхийн төлөө биш, нийгэмд эвтэй найртай амьдрах дүрмийг зохиох зорилготой байх ёстой. Төр иргэдээ яллахын оронд нийгэм өөрөө өөрийгөө эмчилж, асуудлаа иргэний журмаар шийдвэрлэдэг тогтолцоо руу шилжих нь зүйтэй гэв.