Зүүн Азийн орнуудад муурыг нохойноос илүүд үзэж байна
Зүүн Азийн орнуудад хүмүүс нохойноос илүү муурыг гэрийн тэжээвэр амьтнаар сонгох болсон томоохон соёл, хүн ам зүйн өөрчлөлт гарч байгааг 2026 оны тавдугаар сарын сүүлийн үеийн мэдээллүүд харуулж байна.
CNN агентлагийн онцолсон энэхүү шилжилт нь Тайвань, Япон, Хятад зэрэг улсуудад эрчимтэй явагдаж байгаа бөгөөд хотжилт, ганцаардал болон эдийн засгийн хүчин зүйлс голлон нөлөөлжээ.
Тайванийн Хөдөө аж ахуйн яамны 2026 оны дөрөвдүгээр сард гаргасан судалгаагаар тус арал дээрх муурны тоо анх удаа нохойноос давсан байна. Тодруулбал, тэжээвэр муурны тоо толгой 2023 онд 1.3 сая байсан бол 2025 онд 33 хувиар өсөж, 1.74 сая хүрчээ. Харин нохойны тоо 1.2 хувиар буурч 1.46 сая болсон байна. Япон улсын хувьд энэ өөрчлөлт бүр арваад жилийн өмнө эхэлсэн бөгөөд өдгөө нийт тэжээвэр муур, нохойны тоо 15 хүртэлх насны хүүхдийн тооноос хэдийнээ давжээ. Японд нохой тэжээгчдийн тоо 2008 онд 13 сая байсан бол 2022 онд 7.5 сая болж огцом унасан байна.
Хятад улсад 2021 онд хийгдсэн судалгаагаар тэжээвэр амьтантай хүмүүсийн 70 гаруй хувь нь муур, дөнгөж 40 хувь нь нохой тэжээдэг гэсэн үр дүн гарсан байдаг. Вьетнам зэрэг хөгжиж буй зах зээлд ч муурны тоо толгой жилд 4 хувиар өсөж байгаа нь нохойны өсөлтөөс хоёр дахин өндөр үзүүлэлт юм.
Судлаачид болон малын эмч нар энэхүү өсөлтийг хотжилттой холбон тайлбарлаж байна. Залуучууд хүн ам шигүү суурьшсан хотын төв рүү нүүж, жижиг орон сууцанд амьдрах болсон тул бага зай шаарддаг, салхилуулах хэрэггүй, хөршүүдэд дуу чимээний төвөг учруулдаггүй муурыг илүүд үзэх болжээ.
Хүн ам зүйн өөрчлөлт болон эдийн засгийн хүчин зүйлс нь муур тэжээгчдийн эгнээг тэлэхэд хүчтэй түлхэц өгч байна. Зүүн Азийн залуучууд гэрлэлтээ хойшлуулах, цөөн хүүхэдтэй байх, эсвэл ганцаараа амьдрах хандлага нэмэгдсэн нь ганцаардлыг бий болгож, арчилгаа бага шаардах амьтан тэжээх хүслийг өдөөжээ. Түүнчлэн амьдралын өртөг болон мал эмнэлгийн үйлчилгээний үнэ өсөж байгаа нь эдийн засгийн хувьд хэмнэлттэй сонголт хийхэд хүргэж байна.
Муур нь нохойг, тэр дундаа том үүлдрийн нохойг бодвол хоол хүнс болон арчилгааны зардал багатай байдаг. Мөн нохой тэжээгчид ихэвчлэн ганц л нохойтой байдаг бол муур тэжээгчид хоёр болон түүнээс дээш муур үрчилж авах магадлал өндөр байгаа нь тоо толгойн хурдацтай өсөлтөд нөлөөлж байна.
Энэхүү хүн ам зүй, нийгмийн шилжилт нь бүс нутгийн гэрийн тэжээвэр амьтны зах зээлийг бүхэлд нь өөрчилж байна.
Зах зээлийн шинжээчдийн таамаглаж буйгаар 2030 он гэхэд Ази, Номхон далайн бүс нутаг дахь нохой, муурны хоолны нийт борлуулалтын талаас илүү хувийг буюу 56 хувийг зөвхөн муурны хоол эзлэх төлөвтэй байна. Цаашид муурны элс, ухаалаг төхөөрөмжүүд болон дээд зэрэглэлийн хоол тэжээлийн борлуулалт эрчимтэй өсөх хандлагатай байгаа нь энэхүү соёлын өөрчлөлт урт хугацаанд үргэлжлэхийг баталж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.