🔴Ж.Нарангарав: О.Амгаланбаатар УИХ-ын тухай хуулийг зөрчиж, өргөсөн тангаргаасаа няцсан тул эгүүлэн татах үндэслэлтэй

Сэтгүүлч Ж.Нарангарав Говь-Алтай аймагт байрлах Нарансэвстэйн боомтыг нээх эсэх асуудлаар хэвлэлийн хурал хийж, уг үйл ажиллагаа нь Монгол Улсын бус, БНХАУ-ын Ганьсу мужийн эрх ашигт үйлчилж байна хэмээн мэдэгдлээ.

Сэтгүүлч Ж.Нарангарав:

-УИХ-ын гишүүн О.Амгаланбаатар энэ асуудалд манлайлж, гаднын эрх ашгийг хамгаалж байна. БНХАУ-ын Ганьсу мужийн Худалдааны газраас гаргасан хоёр албан бичиг надад байна. Энэ баримтуудад Нарансэвстэй буюу Мазуншан боомтыг дахин нээх нь Хятадын талд ашигтай. Үүний тулд Монголын холбогдох албан тушаалтнуудтай хэрхэн уулзаж, тохиролцсон талаар тайлагнасан байгаа. 

Ганьсу мужийн Худалдааны газрын тайланд бичсэнээр, Хятадын тал боомтыг нээх бэлтгэлээ бүрэн хангаж, зургаан эгнээ хурдны зам татсан. Мөн 2023-2024 онуудад Монгол Улсаас БНХАУ-д суух Элчин сайд, УИХ-ын дэд дарга нар, Говь-Алтай аймгийн Засаг дарга болон УИХ-ын гишүүн О.Амгаланбаатар нартай удаа дараа уулзаж, боомтыг нээх урьдчилсан зөвшилцөлд хүрсэн. УИХ-ын гишүүн О.Амгаланбаатар 2023 оны 11 дүгээр сард боомт руу явах замын маршрутын танилцуулгыг хийсэн нь Хятадын талтай тохиролцсон төлөвлөгөө байсан.

Монгол Улс 1992 онд Говийн дархан цаазат газрыг хамгаалах зорилгоор уг боомтыг хаасан. Гэтэл Хятадын албан бичигт үүнийг Монгол Улс нэг талын шийдвэрээр хаасан хэмээн буруутгасан өнгө аястай бичсэн нь тусгаар тогтносон улсын бодлогыг үл хүндэтгэсэн хэрэг гэж үзэж байна. Хил орчмын сумдын иргэдийн дэмжлэгийг авах, тэднийг өөрсдөдөө татах гэж Хятадын тал зорилтот ажлууд төлөвлөсөн. 

Боомтыг нээх далд зорилго нь баруун аймгуудын ашигт малтмалыг Ганьсу муж руу зөөх. Одоогоор Говь-Алтай аймгийн Алтай сум, Аж богдын нуруу орчимд 100 хувь Хятадын хөрөнгө оруулалттай компаниуд асар том талбайд хайгуулын болон ашиглалтын тусгай зөвшөөрөл авсан. Ингэснээр уул уурхайн компаниуд орон нутгийн удирдлагуудтай гэрээ байгуулахдаа иргэдийн эсэргүүцлийг сумын Засаг даргаар хүчээр даруулах, хариуцлага тооцуулах заалт оруулж байгаа.

УИХ-ын гишүүн О.Амгаланбаатар нь Үндсэн хууль болон УИХ-ын тухай хуулийг зөрчиж, өргөсөн тангаргаасаа няцсан тул эгүүлэн татах үндэслэлтэй. Энэ асуудлын бүх нотлох баримтыг Үндэсний аюулгүй байдлын зөвлөлд хүргүүлж, нарийн бичгийн даргатай нь биечлэн уулзсан. Мөн Аж богдын нурууг төрийн тахилгатай болгох замаар газар нутгаа хамгаалах санал гаргасан.

Тагнуулын ерөнхий газар болон Боловсролын яаманд хандан уриалга гаргаж байна. Баруун хилийн тулгаралт, эх орноо хамгаалж ирсэн түүхэн баримтуудыг ил болгож, залуу үеийг эх оронч үзлээр соён гэгээрүүлэх ажилд хэвлэл мэдээллийн салбартай хамтран ажиллахыг хүсэж байна гэв.