🔴Ардчилсан нам ирэх 20-30 жилийн хөгжлийн стратегийг тодорхойлоход анхаарч ажиллана

Ардчилсан намын Үндэсний бодлогын хороо  тавдугаар сарын 6-ны өдөр хуралдаж, намын дотоод зохион байгуулалт, дүрэм журмын шинэчлэл болон томилгооны асуудлуудыг хэлэлцэн шийдвэрлэсэн. Энэхүү хурлаар Улс төрийн намын тухай хуульд нийцүүлэн үндсэн дүрмээ шинэчилж, намын удирдлагын бүтцийг эцэслэн цэгцэлсэн байна.

Хурлын үр дүнд АН-ын Ерөнхий нарийн бичгийн даргаар С.Баярцогтыг батламжиллаа. Мөн намын таван дэд даргыг 90 хувийн саналаар томилсон бөгөөд УИХ-ын гишүүн Мөнхбаясгалан, УИХ-ын гишүүн Энхтуяа, хуульч Өнөрбаяр, УИХ-ын гишүүн Мөнхтулга, УИХ-ын гишүүн асан Ганибал нар сонгогджээ.

Тэд хот болон орон нутгийн хөгжил, хууль эрх зүй, нийгэм, залуучуудын асуудал зэрэг үндсэн таван чиглэлийг хариуцан ажиллах юм. Түүнчлэн 15 хүний бүрэлдэхүүнтэй Дотоод хяналтын хороог байгуулж, даргын үүрэг гүйцэтгэгчээр УИХ-ын гишүүн асан Д.Түвдэндоржийг томилжээ.

Намын дотоод бүтцийн хувьд шинэ Үндэсний бодлогын хороо 12 бодлогын зөвлөлтэйгөөр үйл ажиллагаа явуулахаар болсон байна. Мөн ирэх жилүүдэд болох Монгол Улсын Ерөнхийлөгчийн болон УИХ-ын сонгуульд нэр дэвшигчдийг тодруулах журмыг баталжээ. Ингэснээр нэр дэвшигчдийг сонгуулиас 24 сарын өмнөөс ил тод, нээлттэй шалгуураар тодруулах эрх зүйн орчин бүрдсэн гэдгийг намын удирдлагууд онцоллоо.

АН-ын зүгээс сүүлийн саруудад хийгдсэн шинэчлэлийн хүрээнд нам нээлттэй болж, анхан болон дунд шатны байгууллагуудын удирдлагын 70 орчим хувь нь шинэ хүмүүсээр бүрдсэнийг мэдээлэв.

Эдгээрийн 60 хувийг 39 хүртэлх насны залуучууд эзэлж байгаа бөгөөд энэ нь нам доторх үеийн солилцоо, шинэчлэлийн томоохон давалгаа болсон гэж дүгнэж байна. Ирэх зургаадугаар сарын 21-нд болох таван аймаг, 34 сумын ИТХ-ын нөхөн сонгууль нь энэхүү шинэчлэгдсэн бүтцийн эхний сорилт болох юм.

Сөрөг хүчний хувьд АН зөвхөн сонгуульд ялах бус, Монгол Улсын ирэх 20-30 жилийн хөгжлийн стратегийг тодорхойлоход анхаарч ажиллахаа мэдэгдлээ. Энэ хүрээнд гадаад, дотоодын хөрөнгө оруулалтыг хамгаалах, бизнесийн орчныг дэмжих зорилгоор "Эдийн засгийн эрх чөлөөний тухай" хуулийн төслийг боловсруулж, УИХ-д өргөн барихад бэлэн болжээ.

Мөн хууль зүйн салбарт реформ хийж, улс төрчдийг бус иргэдийг хамгаалдаг хууль эрх зүйн орчныг бүрдүүлэх, хөгжлийг зөвхөн Улаанбаатарт төвлөрүүлэхгүйгээр орон нутагт чиглүүлэх, эрчим хүчний хараат бус байдлыг хангах, сэргээгдэх эрчим хүч болон хиймэл оюун ухаанд суурилсан эдийн засгийг хөгжүүлэх бодлогыг дэвшүүлж байна.

Цаг үеийн асуудлаар тус намаас нийслэлийн түгжрэлийг бууруулах нэрийдлээр хэрэгжүүлэх гэж буй Туулын хурдны замын төслийг олон нийтэд нээлттэй бус, хууль бус санхүүжилтээр явагдаж болзошгүй хэмээн шүүмжилж, албан ёсны байр сууриа илэрхийлсэн байна. Түүнчлэн АН-ын төв байрны өмчлөлтэй холбоотой маргааныг хуулийн байгууллагаар шийдвэрлүүлэхээр шүүхэд хандсан бөгөөд анхан шатны шүүх хуралдаан эхэлж, ирэх зургаадугаар сард үргэлжлэн хэлэлцэгдэхээр товлогдсон талаар мэдээллээ.