Адольф Гитлерийн амиа хорлосон тухай шинэ нууц баримтууд ил болов
ОХУ-ын Холбооны аюулгүй байдлын албанаас Адольф Гитлерийн амиа хорлосон үйл явдлын нарийн ширийн мэдээллийг агуулсан түүхэн архивын баримтуудыг шинээр нууцын зэрэглэлээс гаргалаа.
Эдгээр баримт бичгүүд нь 1945 онд Берлин хотыг хамгаалах ажиллагааг удирдаж байсан Артиллерийн генерал Хельмут Вайдлингийн мэдүүлэгт үндэслэсэн бөгөөд Нацист Германы удирдагчийн сүүлчийн өдрүүдийн талаарх чухал баримтуудыг дэлгэсэн байна.
Генерал Хельмут Вайдлинг 1945 оны 5 дугаар сарын 2-нд Зөвлөлтийн цэргүүдэд бууж өгсөн бөгөөд хожим 1952 онд дайны гэмт хэрэг үйлдсэн хэргээр 25 жилийн хорих ял сонсож байжээ.
Түүний байцаалтын тэмдэглэлд дурдсанаар, Адольф Гитлер 1945 оны 4 дүгээр сарын 30-ны өдрийн 15:00 цагийн орчимд газар доорх хоргодох байрандаа амиа хорлосон байна. Үүний дараа түүний цогцсыг Рейхканцлерын цэцэрлэгт хүрээлэн дэх бөмбөгдөлтийн тогоонд шатаажээ. Тухайн өдрийн 17:00 цагт генерал Вайдлинг Рейхканцлерт дуудагдан очиж, удирдагчийнхаа өрөөнд орсон байна.
Хоргодох байранд очих үедээ тэрээр Гуравдугаар Рейхийн удирдлагын ойрын хүрээллийнхэн болох Суртал ухуулгын сайд Йозеф Геббельс, Рейхслейтер Мартин Борман болон Жанжин штабын дарга, генерал Ханс Кребс нартай уулзжээ. Энэ үеэр генерал Ханс Кребс удирдагч нь хэдхэн цагийн өмнө өөрийнхөө амийг егүүтгэсэн болохыг Вайдлингт биечлэн мэдэгдсэн байна. Цаашдын зааварчилгаа иртэл уг мэдээллийг чандлан нууцлахыг түүнд хатуу даалгажээ.
Шинээр ил болсон баримтуудын хамгийн ноцтой хэсэг нь Нацистын удирдлагууд Гитлерийн амиа хорлосон тухай болон түүний гэрээслэлийн дагуу байгуулагдсан шинэ засгийн газрын бүтцийн талаарх мэдээллийг зөвхөн Зөвлөлтийн удирдагч Иосиф Сталинд албан ёсоор мэдэгдэхээр шийдвэрлэсэн явдал юм.
5 дугаар сарын 1-ний үүрийн 03:50 цагт генерал Ханс Кребс Зөвлөлтийн 8 дугаар гвардийн армийн командлалын байранд гал зогсоох хэлэлцээ хийхээр очихдоо энэхүү мэдээллийг хүргэжээ. Улмаар Зөвлөлтийн генерал Василий Чуйков маршал Георгий Жуков руу утасдаж, Жуков уг мэдээг Москва руу Сталинд яаралтай илтгэсэн байна.
Германы радио 5 дугаар сарын 1-ний орой Гитлерийн үхлийн талаар дэлхий нийтэд албан ёсоор зарласан хэдий ч амиа хорлосон гэх баримтыг зориуд нуун дарагдуулсан байдаг. Энэхүү түүхэн баримтууд ил болсноор Дэлхийн хоёрдугаар дайны төгсгөл үеийн үйл явдлууд, ялангуяа Нацист Германы сүүлчийн өдрүүдийн улс төрийн шийдвэрүүд болон мэдээллийн нууцлалын талаарх түүхчдийн ойлголтыг улам бүр баяжуулж байна.
Эх сурвалж:
• news.ru
• dzen.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.