Ослын улмаас ой санамжаа алдсан эхнэртэйгээ дахин гэрлэжээ
Азийн хэвлэл мэдээллийн хэрэгслүүд болон "AsiaOne" цахим хуудас саяхан нэгэн сэтгэл хөдөлгөм түүхийг нийтэлжээ. Хүнд ослын улмаас ой санамжаа алдсан эхнэртэйгээ дахин гэрлэж, шинэ дурсамж бүтээхээр шийдсэн Малайз залуугийн үйлдэл олон нийтийн анхаарлыг татаад байна. Уг гэнэтийн хуримын ёслолыг нөхөр нь өөрсдийн гэртээ зохион байгуулсан бөгөөд гэр бүлийн үнэ цэнэ, хайр халамжийн бодит жишээг харууллаа.
Одоогоос арван жилийн өмнө гэргий нь ноцтой осолд орж, ухаангүй байдалд орсон байна. Тэрээр комноос сэрэхдээ өнгөрсөн амьдралынхаа ихэнх дурсамжийг, тэр дундаа нөхөр болон хүүхдүүдээ танихгүй болтлоо ой санамжаа алдсан байжээ. Осол түүний бие махбодод ч хүндээр нөлөөлж, олон жилийн турш тасралтгүй эмчилгээ, асаргаа шаардлагатай болсон байна. Энэ хүнд хэцүү цаг үед тэдний хүүхдүүд маш бага байсан хэдий ч нөхөр нь гэр бүлээ тэжээхийн зэрэгцээ эхнэрээ асрах бүх хариуцлагыг өөртөө үүрчээ.
Урт удаан хугацааны хүнд сорилтыг хамтдаа давсны эцэст нөхөр нь ханьдаа зориулан гэнэтийн хуримын ёслолыг бэлджээ. Хосууд уламжлалт хувцсаараа ижилсэн гоёж, хоёр хүүгийнхээ хамт гэртээ орж ирэхэд хүүхдүүд нь цэцгийн дэлбээ цацан угтсан байна. Ёслолын үеэр нөхөр нь эхнэрийнхээ хуруунд анхны хуримын бөгжийг нь дахин зүүж өгсөн бөгөөд гэнэтийн бэлгийг харсан эхнэр нь баярын нулимс унагажээ. Үйл явдлын бичлэгийг гэрэл зурагчин болон дүрс бичлэгийн багийнхан баримтжуулан үлдээсэн байна.
Дээрх түүх "TikTok" цахим платформын "@storie.my" хаягаар цацагдсан даруйдаа 525 мянга гаруй хандалт, 124 мянган удаа хуваалцаж, цахим орчинд эрчимтэй тархжээ. Бичлэгт эхнэр нь "Би түүнийг нөхрөө болгож сонгохдоо алдаа гаргаагүй" хэмээн гүн талархал илэрхийлсэн бол нөхөр нь "Энэ бол миний үүрэг хариуцлага байсан. Ямар ч саад бэрхшээл тулгарсан бид түүнээс зугтах биш, нүүр тулан давах ёстой" гэж өнгөрсөн арван жилийн амьдралаа дүгнэн ярьсан байна.
Цахим хэрэглэгчид нөхрийнхөө үнэнч шударга, халамжтай занг өндрөөр үнэлж, хөвгүүддээ жинхэнэ эр хүний үлгэр дуурайлал болж чадсан хэмээн магтан сайшааж байна.
Эх сурвалж:
• vk.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.