"Хэн бөх унтах вэ" тэмцээн аваргаа шалгаруулав
Өмнөд Солонгосын нийслэл Сөүл хотын захиргаанаас иргэдийнхээ дунд хэт их ажиллах соёлын эсрэг чиглэсэн гурав дахь удаагийн "Унтах тэмцээн"-ийг Хан мөрний эрэг дэх Ёоидо цэцэрлэгт хүрээлэнд зохион байгууллаа.
Тавдугаар сарын 2-ны бямба гаргийн 15:00 цагт эхэлсэн арга хэмжээ нь архаг ядаргаа, нойргүйдэлд өртсөн олон зуун иргэнийг хамруулж, олон нийтийн газар тайван амрах ховор боломжийг олгосноороо онцлог байв.
Зохион байгуулагчдын зүгээс оролцогчдод өвөрмөц шаардлага тавьсан бөгөөд тэд ядарсан байх, цадталаа хооллосон байхын зэрэгцээ нойрсож буй гүнж, эсвэл хунтайжид тохирох хувцас өмсөх ёстой байжээ. Тэмцээний ялагчийг унтсан хугацаагаар бус, харин нойрны чанараар шалгаруулсан байна. Албаны хүмүүс оролцогчдын зүрхний цохилтыг тусгай төхөөрөмжөөр хянаж, хамгийн тогтвортой хэмнэлтэй буюу хамгийн гүн, тайван нойрссон хүнийг тодруулжээ.
Шалгаруулалтын дүнд 80 эргэм насны нэрээ нууцалсан эрэгтэй тэргүүн байр эзэлсэн бол 37 настай оффисын ажилтан Хван Ду Сон дэд байрт шалгарсан байна. Тэрээр шөнийн ээлжинд ажиллаж, байнга машин барьдгаас үүдэн маш их ядарсан байсан бөгөөд голын салхинд эрч хүчээ амжилттай нөхөж чадсан гэдгээ хуваалцжээ.
Оролцогчид хувцаслалтын дүрмийг маш бүтээлчээр хүлээн авсан байв. Тухайлбал, шалгалтад бэлдэх болон цагийн ажлаас шалтгаалан хоногт ердөө гурваас дөрвөн цаг унтдаг 20 настай оюутан Пак Жун Сок хаан хүн хэрхэн унтдагийг харуулахаар Чусон гүрний хааны улаан торгон нөмрөгтэй ирсэн байна. Мөн нойргүйдлийн асуудалтай 24 настай англи хэлний багш Юү Ми Ён коала баавгайн шидэт хүчийг ашиглах найдвараар том хэмжээтэй баавгайн өмсгөлтэй ирсэн бол зарим хүн Цасангоогийн дүрд хувирчээ.
Хэдийгээр уг арга хэмжээ нь хөгжилтэй уур амьсгалтай байсан ч цаанаа нийгмийн эрүүл мэндийн ноцтой асуудлыг хөндөж байна.
Эдийн засгийн хамтын ажиллагаа, хөгжлийн байгууллагын гишүүн орнууд дунд Өмнөд Солонгос нь хамгийн их нойрны дутагдалтай, хэт их ажилладаг үндэстнүүдийн нэгд тооцогддог. Өндөр ачаалалтай шалгалт, 24 цагийн худалдааны төвүүд болон ширүүн өрсөлдөөнөөрөө алдартай Сөүл хотын хувьд энэ төрлийн тэмцээн нь иргэдийнхээ эрүүл мэндэд анхаарал хандуулах чухал алхам болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.