🔴П.Батчулуун: Донороо хүлээж байгаа олон өвчтөнд энэ хууль амьдрал бэлэглэнэ

Донорын тухай хуулийн шинэчилсэн найруулгын төсөл УИХ-ын эцсийн хэлэлцүүлгээр дэмжигдэж, Монгол Улсад эрхтэн шилжүүлэн суулгах эмчилгээний шинэ үе эхлэхэд бэлэн боллоо. Энэхүү хуулийн ач холбогдол болон салбарын өнөөгийн нөхцөл байдлын талаар эмч П.Батчулуун мэдээлэл өглөө.

П.Батчулуун:

-Энэхүү хууль нь маш олон хүний олон жилийн хөдөлмөр, оюун ухаан шингэсэн бүтээл болсон. Дэлхийн 90 гаруй улсад хэрэгждэг жишгээр батлагдлаа. Хуулийн гол онцлог нь амьгүй донороос эрхтэн шилжүүлэн суулгах харилцааг нарийвчлан зохицуулсан явдал. Тархины үхжилттэй буюу цус харвалтын улмаас нас барсан иргэний ар гэр зөвшөөрсөн, эсвэл тухайн хүн амьд ахуйдаа донор болох зөвшөөрлөө өгсөн тохиолдолд бусдын амь насыг аврах боломж бүрдэж байна. 

Энэ хуулийн төслийг 2022 онд УИХ-ын гишүүн Ж.Чинбүрэн, Н.Учрал, Д.Сарангэрэл нар өргөн барьж байсан. Байнгын хорооны дөрөв, нэгдсэн хуралдааны хоёр удаагийн хэлэлцүүлгээр орж ийнхүү батлагдах шатандаа хүрчээ. Хуулийг дагалдан хэрэгжилтийг хангах долоон журам боловсруулагдах бөгөөд энэ нь цаашид залуу эмч нарын ажиллах эрх зүйн орчныг баталгаажуулж, салбарын хөгжлийг эрчимжүүлэх чухал ач холбогдолтой. 

Дэлхийн эрүүл мэндийн байгууллага болон Дэлхийн эрхтэн шилжүүлэн суулгах нийгэмлэгээс амьд донорын тоог багасгаж, амьгүй донороос эрхтэн шилжүүлэн суулгахыг илүүд үзэх зөвлөмж гаргадаг. Хэдийгээр ирээдүйд генийн инженерчлэл, үүдэл эсийн эмчилгээ хөгжих хандлагатай байгаа ч ойрын 15-20 жилдээ амьд болон амьгүй донороос эрхтэн шилжүүлэн суулгах эмчилгээ голлох үүрэгтэй хэвээр байна. 

Монгол Улсын хүн ам 3.6 саяд хүрч, үүнийгээ дагаад өвчлөл нэмэгдэж байгаа. Тиймээс иргэд эрхтэн шилжүүлэн суулгах хэмжээний хүнд өвчинд нэрвэгдэхээс урьдчилан сэргийлж, эрүүл амьдралын хэв маягийг сахих, архи тамхинаас татгалзах, жингээ барих зэргээр өөрийн эрүүл мэнддээ хариуцлагатай хандах шаардлагатай. Засгийн газраас хэрэгжүүлж буй эрт илрүүлгийн хөтөлбөр үүнд чухал үүрэгтэйг дурдлаа.

Сүүлийн хоёр жил орчмын хугацаанд манай улсад амьд донороос эрхтэн шилжүүлэн суулгах эмчилгээ хийгдэж байгаа ч амьгүй донорын асуудал хүлээгдэлтэй байсны улмаас донороо хүлээж байгаад нас барах харамсалтай тохиолдлууд цөөнгүй гарсан. Харин энэхүү шинэ хууль батлагдсанаар хүлээлгийн жагсаалтад байгаа олон хүний амь насыг аврах эерэг үр дүн гарч, Монгол Улсын эрхтэн шилжүүлэн суулгах эмчилгээнд шинэ үе эхэлнэ гэдэгт салбарын эмч, мэргэжилтнүүд бүрэн итгэлтэй байна гэв.