Эрүүл мэндийн салбарын лабораторийн тусламж үйлчилгээний чанар, аюулгүй байдлыг дээшлүүлнэ

Эрүүл мэндийн салбарын лабораторийн тусламж, үйлчилгээний чанар, хүртээмжийг нэмэгдүүлэх зорилготой сургалт, хэлэлцүүлэг амжилттай зохион байгуулагдлаа.

Арга хэмжээний нээлтэд Эрүүл мэндийн яамны Төрийн нарийн бичгийн дарга Н.Эрдэнэбаяр оролцож, лабораторийн үйлчилгээний чанарыг сайжруулах, иргэдийн хүртээмжийг нэмэгдүүлэх, орон нутгийн лабораториудын чадавхыг бэхжүүлэх нь салбарын хөгжлийн чухал чиглэл болохыг онцлон тэмдэглэв.

Тэрээр мөн Өвчний хяналт, сэргийлэлтийн үндэсний төвийг байгуулж, лабораторийн тогтолцоог бэхжүүлэх, цаашид 21 аймагт үе шаттайгаар өргөжүүлэх ажлыг хэрэгжүүлж буй талаар мэдээлэл өглөө. Хэлэлцүүлгийн үеэр лабораторийн салбарт тулгамдаж буй хүний нөөцийн хомсдол, чанарын хяналтын тогтолцоо, үйлчилгээний аюулгүй байдал зэрэг асуудлыг хөндөж, эдгээрийг сайжруулах бодлогын арга хэмжээг эрчимжүүлэх шаардлагатайг оролцогчид онцолсон юм.

Энэхүү сургалт, хэлэлцүүлэг нь лабораторийн тусламж, үйлчилгээний чанар, аюулгүй байдлыг дээшлүүлэх, улмаар иргэдэд үзүүлэх эрүүл мэндийн үйлчилгээний үр нөлөөг нэмэгдүүлэхэд чухал ач холбогдолтой юм.